الأحد، 22 نوفمبر، 2009

الا موت يباع فأشتريه ؟

يذكر لنا التاريخ أن محمد المهلبي كان فقيراً معدماً لا يملك قوت يومه.

حتى أنه سافر ذات مرة فأخذ يتمنى الموت من شدة فقره ويقول:

ألا موت يباع فأشتريـه *** فهذا العيش ما لا خير فيـه

ألا موت لذيذ الطعم يأتي *** يخلصني من العيش الكريـه

إذا أبصرت قبراً من بعيد *** وددت أنني مما يـــليـه

ألا رحم المهيمن نفس حر *** تصدق بالوفاة على أخيــه

فقام صاحب له ورثى لحاله وأعطاه درهما.

ثم تمر الأيام ويعتنى المهلبي بنفسه، ويجتهد ويترقى في المنصب،

حتى أصبح وزيراً، وضاق الحال بصاحبه (الذي أعطاه درهماً)

فأرسل رقعة إلى محمد المهلبي كتب فيها:

ألا قل للوزير فدته نفسـي *** مقال مذكر ما قد نسيه

أتذكر إذ تقول لضنك عيش *** ألا موت يباع فأشتريه؟

فلما قرأ محمد المهلبي الرقعة أمر له بسبعمائة درهم،

ثم كتب تحت رقعته قوله - تعالى -:

" مثل الذين ينفقون أموالهم في سبيل الله كمثل حبة أنبتت سبع سنابل
في كل سنبلة مائة حبة والله يضاعف لمن يشاء والله واسع عليم".

ثم قلده عملاً يسترزق منه،

ترى هل ركن المهلبي إلى فقره ورضخ إلى حاله البائس؟

أم أن نفسه التائقة إلى السمو دفعته كي يكون شيئاً مؤثراً له قيمة

ووزن في هذه الحياة؟

إن فقره وضيق حاله لم يمنعاه من المساهمة في هندسة الحياة

وإحداث التأثير الذي أراده هو لنفسه.


و كما قيل:

لا يدرك المفاخر

من رضي بالصف الآخر

الثلاثاء، 27 أكتوبر، 2009

الثلاثاء، 20 أكتوبر، 2009

عن النقاب أتحدث (2-3)

لا شك أن الرأى السائد بأجبار الطالبات وموظفات الحكومه على خلع النقاب أتجاه يفتقد تماما الى الصحه أو العقلانيه , فالعلمانيه الصحيحه نفسها تعطى الحريه لكل شخص فى ممارسة مايعتقده من شعائر دينه طالما لا يتعدى بهذه الحريه على حرية الأخرين فما بالك بدوله تنص الماده الثانيه من دستورها على أعتبار الدين الأسلامى دين الدوله الأساسى . وأن كان لنا كدوله أسلاميه تطبق الشريعه الأسلاميه منع النقاب بأعتبار أنه ليس من الدين فى شئ , فأولى لنا العمل بالمثل تجاه المتبرجات والكاسيات العاريات وهم كثر .
لكن الأولى بالدوله ممارسة دورها عن طريق المؤسسات الدينيه والتى لابد وأن أن تقوم بدورها فى تنبيه المواطنين بموقف الدين من النقاب سواء بالسلب أو الأيجاب وذلك فى مواجهة التيارات المتطرفه التى تنتشر الان بصوره كبيره ولهم بعد ذلك حرية الأختياردون أدنى إجبار.
أخر ما خرج علينا به واحد من أهم أثنين من الدعاه لدى جمهور شيوخ الجلابيب واللحى الطويله بفتوى تقر ليس بجواز النقاب ولا بكونه مستحب أو فضيله أو حتى سنه , ولكنه أقر بوجوبه .. نعم تماما كوجوب الصلاه والصوم والزكاه .
السكوت على هذه الدعاوى المتطرفه يفتح الباب الى التحول الى أفغانستان أخرى إبان حكم طالبان فيبدأ الأمر بالنقاب ثم الشادور ثم الخيمه اياها أياً كان مسماها
وأكثر مايسير العجب الان مايتهم به أنصار النقاب مخالفيهم بأنهم ممن يساهمون فى أشاعة الفاحشه فى الأمه , رغم أن وجوب النقاب هو أتهام صريح للنصف الذكرى ف المجتمع بالفلتان والعين الزائغه , فالنقاب لا يعالج المشكله ولكنه كما يقولوا " بيردم عليها " فبدل حس الذكور وتنبيهم على غض النظر نسودها فعينهم .فاو كانت المشكله فى القضاء على المعصيه فأنا هكذا لم أفعل ذلك وستظل المعصيه موجوده خصوصا وكأنك تهتم بدرء المعصيه عن النساء وكأن الذكور ليس منا فتعميم النقاب لن يؤدى بالذكور لغض النظر لأنهم سوف يجدون مرادهم فى أماكن أخرى
ويتهرب أنصار النقاب من حقيقة أن النقاب لن يساهم فى حماية الفتاه من أى خطر قد يحيق بها , فالجميع يعلم أن ممارسوا حفلات التحرش ف الأعياد لم يكونوا يفرقوا بين متبرجه أو منتقبه , سلوك الفتاه نفسه وبعدها عن مواطن الشبهات وأيمانها الحقيقى بجوهر دينها وليس قشوره هو مايكفل حمايتها فى كل الحالات
أعلم أن 95% من مرتديات النقاب يرتدونه لأرضاء الله وطاعته واكنهم فى نفس الوقت يقدمون فرصه على طبق من فضه للـ 5% ليمارسون فسادهم تحت ستار الدين ممثل ف النقاب . فمتبرجه ننتظر توبتها خير من عاصيه متستره تحت نقابها ندعو لها "ربنا يزيدك يابنتى"

الاثنين، 12 أكتوبر، 2009

عن النقاب أتحدث (1- 3)

أولا لا تأخذ كلامى بمحمل الجد فأنا أكثرا الناس كلاما وأقلهم علما وعملا , لذلك عندما تقرأ هذا الكلام أعتبره هلوسه أخرى من هلاوسى , ورغم أيمانى الكامل برؤيتى المتمثله في هذا الكلام الا أنى لا أريد منك هذا الأيمان بتلك الرؤيا ولا حتى أتوقعه.
قبل أيام من شطحات ونطحات شيخ الأزهر الأخيره كنت أنوى الكتابه وأبداء رأيى فيما يتعلق بالنقاب لا لشئ الا أنى شعرت به يحاول أن يقتحم خطوطى الدفاعيه ويغزونى فى عقر دارى , ولعلمى الكامل بتطرف أفكارى أمتنعت عن الكتابه فى هذا الموضوع وذلك مع تقهقر تلك الهجمات الى الخلف مره أخرى .

لكن مع زيادة الشد والجذب بعد تصريحات شيخ الأزهر أعتقد أن الفرصه قد حانت فقد تكلم الجميع ( ومجاتش عليا أنا يعنى ) مع التأكيد على أننى من أشهد كارهى شيخ الأزهر ومعارضيه .
مبدئيا أتحدى أى شخص من مؤيدى النقاب أن يأتى بآيه واحده من أيات القرءان أو بحديث واحد من الأحاديث النبويه المطهره يتطرق الى موضوع النقاب من قريب أو بعيد سواء بالسلب أو الأيجاب .
وعندما يفشل أحدهم فى ذلك يعلنها فى وجهك أنها فضيله وسنه عن أمهات المؤمنين ويتناسى أن الله قد أختص النبى وزوجاته بالعديد من الفضائل والكرامات كزواج الرسول من أكثر من أربعه وعدم أكله الصدقه وعدم جواز زواج أمهات المؤمنين بعد النبى وأيضا فيما ذكره الله تعالى فى كتابه الكريم " واذا سألتموهن متاعا فسألوهن من وراء حجاب "فهى كرامه أختصها الله أيضا لأمهات المؤمنين وذلك بأجماع العلماء وأيضا فى قوله تعالى " يانساء النبى لستن كأحد من النساء"
لو أراد الله للنساء أن تخفى وجوهها لخلق النساء جميعا متشابهات , والذين يعتقدون بوجوب أخفاء الوجه فيما أذا كانت المرأه جميله . إذن منذ متى خلق الجمال كى يكون نقمه تستوجب أخفاء الوجه .
المعروف والذى قد ذكر فى أكثر من موضع أن النقاب كان أحد العادات والتى توارثها المسلمون عن الجاهليه . وقبل أن ترمينى بالتكذيب و ألتهامات أقول لك أنه من المعروف أيضا أن العرب ف الجاهليه كانوا يتمتعون بصفات كريمه كثيره لا يتمتع بها أغلب مسلموا هذا الوقت مثل الشجاعه والكرم والأمانه , الخ
الله قد خلق لنا عقول كى نفكر بها , الأدله على عدم شرعية النقاب بالعشرات من القراءان والسنه لأصحاب العقول, وسوف يتم عرضهم بالكامل إذا شاء الله فى نهاية الحديث عن النقاب .. والله ولى التوفيق .

و للحديث بقيه .

الأربعاء، 7 أكتوبر، 2009

يامصرى ليه

يامصرى ليه دنياك لاخبيط والغلب محيط
والعنكبوت عشش ع الحيط وسرح ع الغيط
يامصرى قوم هش الوطاويط كفايك تبليط
صعبه الحياه والحل بسيط حبة تخطيط

فتحت باب إستيرادك
وصرفت فوق ضعف إيرادك
حلى للخواجه إستكرادك
سابك بتقرا ف أورادك
وده قشطك ونزل تشفيط

ومهولاتى تحب تزيط
ساعة الفرح زغاريط تنطيط
وف المياتم هات ياصويت
وف المظاهره سخن تشيط
و ف الأنتخاب تنسى التصويت

وليه بترشى وتتساهل؟؟
وتضيع حقوقك بالساهل ؟؟
تستاهل النار تستاهل
ياغويط ويحسبك الجاهل
ساهل وساهى وغبى وعبيط

يامصرى ياللى الغلا عصرك
والنهب فى عصرك حصدك
قوم للحياه وأسبق عصرك
ولا حاجه هترجع نصرك
الا ان تكون شغال ونشيط


ملحوظه : الأغنيه فى الأصل بصوت على الحجار وهى أفضل 1000 مره طبعا بس الفيديوهات الموجوده ع اليوتيوب بصوت على الحجار تودى فداهيه , والمدونه قد بدأت مؤخرا فى أتباع سياسة المشى جنب الحيط , لذا فى حالة وجود أى حاجه تضايق أى حد مهما يكن فعليهم وعلى علي الحجار واليوتيوب شخصيا ويبقوا يورونى شطارتهم .



الأحد، 4 أكتوبر، 2009

الكبائر .. كفانا الله شرها

الحمد لله والصلاة على رسول الله



الكبائر السبعين
من كتاب الكبائر للإمام الحافظ شمس الدين الذهبي


1- الشرك بالله
2- قتل النفس
3- السحر
4- ترك الصلاة
5- منع الزكاة
6- إفطار يوم من رمضان بلا عذر
7- ترك الحج مع القدرة عليه
8- عقوق الوالدين
9- هجر الأقارب
10- الزنا
11- اللواط
12- أكل الربا
13- أكل مال اليتيم وظلمه
14- الكذب على الله ورسوله
15- الفرار من الزحف
16- غش الإمام الرعية وظلمه لهم
17- الكبر والفخر والخيلاء والعجب والتيه
18- شهادة الزور
19- شرب الخمر
20- القمار
21- قذف المحصنات
22- الغلول من الغنيمة
23- السرقة
24- قطع الطريق
25- اليمين الغموس
26- الظلم
27- المكاس
28- أكل الحرام وتناوله على أي وجه كان
29- أن يقتل الإنسان نفسه
30- الكذب في غالب أقواله
31- القاضي السوء
32- أخذ الرشوة على الحكم
33- تشبه المرأة بالرجال
34- وتشبه الرجال بالنساء
35- الديوث المستحسن على أهله
36- المحلل والمحلل له
37- عدم التنزه من البول
38- الرياء
39- التعلم للدنيا وكتمان العلم
40- الخيانة
41- المنان
42- التكذيب بالقدر
43- التسمع على الناس وما يسرون
44- النمام
45- اللعان
46- الغدر و عدم الوفاء بالعهد
47- تصديق الكاهن والمنجم
48- نشوز المرأة على زوجها
49- التصوير في الثياب والحيطان والحجر وغيرها
50- اللطم والنياحة وغيرهما
51- الاستطالة على الضعيف والمملوك والزوجة الدابة
52- أذي الجار
53- أذي المسلمين وشتمهم
54- أذية عباد الله
55- إسبال الإزار والثوب واللباس والسراويل
56- لبس الحرير والذهب للرجال
57- إباق العبد
58- الذبح لغير الله عز وجل
59- فيمن ادعى إلى غير أبيه وهو يعلم
60- الجدال والمراء واللدد
61- منع فضل الماء
62- نقص الكيل والذراع والميزان
63- الأمن من مكر الله
64- أذية أولياء الله
65- تارك الجماعة فيصلي وحده بغير عذر
66- الإصرار على ترك صلاة الجمعة والجماعة من غير عذر
67- الإضرار بالوصية
68- المكر والخديعة
69- من جس على المسلمين ودل على عوراتهم
70- سب أحد من الصحابة رضوان الله عليهم أجمعين

و( سبحان ربك رب العزة عما يصفون وسلام على المرسلين والحمد لله رب العالمين )

بصراحه كده الموضوع ده منقول .. ياسلام !! طب ماهو أكيد مفترض انه يبقى منقول ولا أنا غلطان ؟

السبت، 3 أكتوبر، 2009

حاسب على الأحزان وحاسب لها

حاسب على راقبيك من حبلها

راح تنتهى ولابد راح تنتهى

مش أنتهت أحزان من قبلها ؟

وعجبى !!

الخميس، 24 سبتمبر، 2009

كأنى لم أعرف الموت من قبل

إضافة صورة
كأنى لم أعرف الموت من قبل . أن تسمع عنه كثيرا وتفكر فيه دائما شئ , و أن تراه بعينك وتحمله بين يديك وتشعر به فى قلبك شئ مختلف تماما , الحقيقه الوحيده فى الكون التى لا يختلف عليها أثنين , الحدث الذى دائما ماننتظره لكننا دائما ما نزهل لحدوثه , وتأبى الا أن ترفض ، تأبى أن تصدق , وتنتظر أن تستيقظ من النوم قريبا لتجد كل شى وقد عاد الى سابقى عهده , حتى تصل الى نقطة التسليم والقبول بالأمر الواقع , حتى ترى أن الأطفال فى الشوارع مازلوا يلعبون وأن الناس لم تزل بعد تضحك وتبكى تفرح وتحزن . حتى تدرك أن الأرض لم تتوقف عن الدوران وأن العالم لم ينتهى بعد .



لا أراكم الله مكروه فى عزيزا لديكم

الثلاثاء، 15 سبتمبر، 2009

الطريق الى اليونسكو ( اللى أختشوا ماتوا )

أشعر بالخزى كلما طالعت أى رأى للسيد وزير الثقافه منذ أعلانه عن نيته للترشيح لرئاسة منظمة اليونسكو . السيد الوزير لا يستحى أن يضرب بعرض الحقائق كل ما اعتقدناه ثوابت للثقافه المصريه سواء ثقافة النخبه المثقفه أو الثقافه الشعبيه للمواطن البسيط . السيد الوزير لا يستحى أن يخلع ملابسه قطعه قطعه من أجل أرضاء المنظمات اليهوديه وغيرها ممن يقفون حائل بينه وبين المنصب الهام , الغريب أن الوزير يعارض الموقف الرسمى المعلن للنظام والحكومه التى يمثلها بصدد رفض التطبيع ما لا أتصوره هو موقف السيد الوزير أذا فشل ف الفوز بالمنصب – وهذا ما أتمناه شخصيا بصفتى مصرى – هل سيتراجع عما قاله بشأن أعلاء أمر الثقافه اليهوديه و الاسرائيليه ويشحذ هممه للمساهمه فى ترجمة المزيد من الكتب الأسرائيليه كما سبق أن ذكر .
الشئ الوحيد الذى صرح به أنه سيتنازل عن منصبه ف الوزاره أذا فشل ف الفوز بالمنصب , بموقفه هذا يذكرنى بالطفل الذى يمتنع عن الطعام معاندا والديه الذين لما يلبيا مطالبه دون أن يعلم أن الأمر مع غيره لن يختلف كثيرا وأنه هو المضرور الوحيد . معالى الوزير .. اللى أختشوا ماتوا .

السر

السر هو عنوان فيلم وثائقى شاهدته مؤخرا مستسقى من كتاب بنفس الأسم . الفيلم عباره عن شروحات للعديد من علماء الفيزياء وأساتذة علم عن النفس والأطباء للسر الأعظم فى الكون – على حد قولهم – السر الذى قد يغير مجرى حياة أى شخص . ويكمن هاذا السر فى قانون الجذب بمعنى أن كل شئ يحدث لشخص ما ماهو الا نتاج موجات الطاقه سواء الأيجابيه أو السلبيه التى تخرج من هذا الشخص وتعود له مره أخرى , أو بمعنى أخر ان مايحدث للأنسان ليس الا مايفكر فيه, حيث أن الأشخاص المرضى هم أكثر من يتحدثون عن المرض و الأشخاص الناجحين هم أكثر من يتحدثون عن النجاح , هم لا يقيسون هذا الأمر معنويا بمعنى أن تفكيرك ف الأمر السئ سيجعلك تنتهج تصرفات قد تجلعك فريسته ف النهايه , بل أن الأمر طبقا للفيلم الوثائقى مادى تماما بمعنى مجرد تفكيرك ف المر السئ كافى لجذبه , لذلك هم يرون أنه كيفما كانت أحتياجاتك فتفكيرك فى هذه الرغبات أيجابيا كافى لتحقيقها , بمعنى أنك أذا كنت تحتاج المال فلا تفكر فى ديونك و لا تفكر حتى فى كيفية الحصول على المال ولكن تخيل أن هذا المال معك بالفعل وأكثر من التفكير فى هذا والكون سوف يستجيب لك , وحتى لا تصاب بالجنون من تعمد التفكير فى أشياء معينه فأن توجيه العواطف كافى لأصلاح تلك الأمور .
فى رايى أن أمر الطاقات الأيجابيه والسلبيه يبدو منطقيا بعض الشئ ف الأنسان الذى يقابل الناس بأبتسامه لا يتوقع أن يقابله الناس بعبوس , والشخص الذى يكثر من التفكير فى مضايقات الناس يصبح الأكثر عرضه لها بمعنى أن الطاقه سواء كانت أيجابيه أو سلبيه تعود لك مره اخرى فى نفس شكلها .
وبالقياس على الجانب الدينى ف السلام يقول " أدعو الله وأنتم موقنين بالأجابه " فهى أحد شروط أستجابة الدعاء و يقول الله تعالى " أنا عند ظن عبدى بي "
لست هنا لأثبات أو أنكار صحة مايدعيه الفيلم ولكنى أرى ان التفاؤل قد ينجح كثيرا فيما لا يستطيع التشاؤم تحقيقه , هذا ما صرت أؤمن به أخير وما سأسعى للتمسك به .

الاثنين، 14 سبتمبر، 2009

الفيدراليه هى الحل

لم أعد أعتقد فى القنبله النوويه كحل لما تعانيه البلاد من مصائب , قنبله نوويه تقتلع مصر عن جذورها تقضى على الفساد وعلى العشوائيه وعلى الحيتان , حل رائع و تم أختباره بنجاح من قبل , ليتم أعادة بناء البلد من جديد وعلى " نظافه " . لكنه رغم ذلك حل يميل الى الفانتازيا أكثر منه حل واقعى .
لم أعد أعتقد أيضا ف التعليم كحل لأصلاح حال البلد المائل فإذا أفترضنا تحول حال التعليم بالكامل فى مصر للأفضل , فهناك ملايين العوامل الأخرى التى قد تكون كفيله بالقضاء على هذا التحول .
أذا فما هو الحل ؟؟
الحل فى رأيى هوالفيدراليه .. والفيدراليه لمن لا يعرفها هى تعنى الحكم المحلى بمعنى أن الدوله القائمه على مثل هذا النوع من الحكم تكون مقسمه لولايات أو محافظات لكل منها أستقلاليه تامه فى أدارة كافة شئونها عدا الدفاع والخارجيه , حيث يكون لكل ولايه ميزانيتها وقوانينها ونظامها ولا يكون هناك وزراء بالمعنى المتعارف عليه أنما هم مجرد سكرتاريه لتنظيم العمل لا أكثر .والنموذج الأشهر على ذلك هو الولايات المتحده الأمريكيه ودول أخرى مثل سويسرا والمانيا التى لم أعلم بفيدراليتها الا مؤخرا , ومن الدول العربيه الأمارات .
وفى رأيى أن للنظام الفيدرالى عدة مزايا أهما سهولة التركيز بمعنى أنه ليس من المنطقى مانراه اليوم من زيادة الرفاهيه فمدن معينه على حساب مدن أخرى تماما . فافالنظم الفيدراليه تتنافس الولايات فيما بينها لتحقيق معدلات رفاهيه لمواطنيها مثل الأمارات ومثل ولاية كاليفورنيا الأمريكيه التى تحتل المركز الأول على مستوى العالم فى الناتج الصناعى تليها الولايات المتحده نفسها وليس أيضا من المعقول أن يأتى مواطن من الصعيد لأمضاء طلب من مجمع التحرير أو وزارة التربيه والتعليم بالقاهره , وهو مايكفل تماما عدم التركز السكانى ف العواصم . بالأضافه الى أن ذلك النظام يكفل سهولة تحديد المسئوليه وسهولة الرقابه والمحاسبه أيضا بمعنى أن الأمر لا يكون " سداح مداح زى عندنا ".
الا أن أهم عيوب النظام الفيدرالى على الأطلاق هو الاستقلاليه الكبيره التى قد تؤدى الى رغبات أنفصاليه وهو مايتطلب سلطه فيدراليه ( مركزيه ) قويه تضرب بيد من حديد على مثل هذه المحاولات .

الخميس، 10 سبتمبر، 2009

ده عند أمه يا أدهم , ده عند أمه يا عبد الواحد

كلمة تقال في المسنجر تغضب الرب عزوجل
انتشرت كلمة في الماسنجر خطيره ومؤذيه

في حق الاسلام وبالخصوص في حق القرآن الكريم الا وهي كلمة(((
بـــــرب )))الكل قام يقولها وهي بمعنى دقايق او لحظه او عندي شغل .
وكل من قالها ماعرف معناها ولو سألتم اي شخص عن معناها
قال لك والله كلمة وتنقال ونقول زيهم !!!!!!!!!!!!!!!!
لكن هل فكرتم في يوم من الايام معنى هذي الكلمة.
(((
بـــرب))) كلمة استغلها الغرب بواسطة أبناء الاسلام لإغاضة الله تعالى والاستهزاء بدينه وكلامه ,وكمال قال الله في كتابه الحكيم ومن أصدق من الله قيلا {وَدَّ كَثِيرٌ مِّنْ أَهْلِ الْكِتَابِ لَوْ يَرُدُّونَكُم مِّن بَعْدِ إِيمَانِكُمْ كُفَّاراً حَسَداً مِّنْ عِندِ أَنفُسِهِم مِّن بَعْدِ مَا تَبَيَّنَ لَهُمُ الْحَقُّ فَاعْفُواْ وَاصْفَحُواْ حَتَّى يَأْتِيَ اللّهُ بِأَمْرِهِ إِنَّ اللّهَ عَلَى كُلِّ شَيْءٍ قَدِيرٌ }البقرة109فبأبسط الكلمات والعبارات تستطيع الاستهزاء بأعظم ما نزل على الارض.

(((
بــرب))) كلمة مذكوره في قوله تعالى {قل أعوذ (برب) الفلق},
ومذكوره في قوله تعالى {
قل أعوذ (برب)الناس}فاستغل الغرب كلمة (برب) لاستخدامها في اتفه الامور من الكلام
للتنزيل من عظمة الله جل جلاله تعالى الله عما يقولون الظالمون علوا كبيرا.

اخـــــــــــوتــــــــــــي
وكل من مر على الموضوع
وكل من لديه نخوه على الامه الاسلاميه وحب لدينه
وكل من اقشعر بدنه لهذا الموضوع

رجـــــــــــــائــــــــــــــــي منكم


منقول للفائدة

ده عند أمه يا أدهم و ده قبل ماحد يشتمنى أو يقولى ايه الهبل اللى انت منزله عندك ده
هذا هو نوع الهراء المنتشر على المنتديات العربيه والتى تلاقى اهتمام كبير من الشباب العربى أحدهم صديق لى تحدانى أذا استطعت تصفح هذا المنتدى الرائع دون ان انقله نصفه الى مدونتى والحقيقه أنه فاز بالرهان .

بقى فطاحل الغرب كلهم أجتمعوا انسهم وجنهم لأختراع كلمه تسئ للأسلام أسمها برب . يا استاذنا اللى كاتب الموضوه وياأستاذنا اللى ناقله , الغرب سايبلنا التفاهات دى نهتم بيها أحنا حتى يتفرغوا هم للعلم ويسيئوا لنا حق الاسائه , أكاد أجن من تخيل ان فيه ناس بتفكر كده وأن فيه ناس تانيه بتصدقهم .
brb بقت برب , ده جنان ده ولا أيه brb دى أختصار لـ be right back وأظن دى كمان مش محتاجه ترجمه بس لعنة الله على ثقافة الفرانكو أرب اللى وصلتنا لكده
الناس ف العالم كله بتفكر أزاى تعيش ع القمر وتعمل وقود من المايه وأحنا مش عرفين نحل مشكلة الرغيف عشان احنا اتفرغنا لمشكلة برب وما على شاكلتها
الحقيقه أن المسئ الوحيد للأسلام هنا هو صاحب تفاهة brb دى هو اللى هيضضحك علينا الغرب فعلا يوم ورا يوم وهو اللى منه لله هيخليها تيجى فدماغى كل ماكتب brb أو كل ما أقرا " قل أعوذ برب الفلق "


الثلاثاء، 8 سبتمبر، 2009

ياطير

ياطير
أفتح قفصك وطير
أفتح فقلبك باب للأمل الكبير
أفتح لنفسك باب للفرح الطويل
أصرخ بقولة لأ,لو تنحدف ف النار
ما تخافش قولة حق,ده الحق سيف بتار
خلى الباطل ينكسر,خـلى الطغاه تنــــهار
خلى القيود تنكسر,فالـظلم صمتك عــــار

الجمعة، 4 سبتمبر، 2009

إحنا بتوع الأتوبيس

  • كل المواصلات موجوده وجميله والأتوبيسات متوفره وفاضيه وبتروح كل حته ... وده طبعا ماعد الأتوبيس اللى انت مستنيه .المشكله بقى ان الموضوع لو على قد المواصلات كان الواحد ممكن ياخدها مشى- أصلك يعنى مش ممكن هتتجنن وتمشيها تاكسيات , لكن المصيبه بقى ان الوضع ده تقريبا بينطبق على كل حاجه والواحد مبقاش عارف هيقضيها مشى فأيه ولا أيه .

الجمعة، 28 أغسطس، 2009

لعنة الفرانكو أرب

الفرانكو أرب هو مسمى يطلق على العديد من المفاهيم أهمها : كتابة العربيه بأبجديه أنجليزيه أو العكس بمعنى كتابة الأنجليزيه بأبجديه عربيه وهو الذى تقريبا لا يحدث أبدا , وأنتشرت هذه الطريقه ف الكتابه بسرعه كبيره مع أنتشار أجهزة الكمبيوتر والتليفون المحمول لعدة أسباب أهمها : أرتفاع تكلفة الرسائل القصيره باللغه العربيه عنها بالأنجليزيه , حيث يتاح لك عدد أكبر من الحروف باللغه الأنجليزيه للرساله الواحده بالمقارنه بالرساله المكتوبه بأبجديه عربيه , فكان الفرانكوأرب أحد الطرق للتحايل على ذلك , بالأضافه لأنتشارها بصوره أكبر على الأنترنت وهو مابرره أحد مستخدمى هذه الطريقه بالاتى : عايز تكتب أنجليزى ماشى ,عربى شغال .
وبعد أن كانت تقتصر على الشات أو الدردشه أنتقلت الى التعليقات والردود على أغلب المواقع أهمها اليوتيوب والفيس بوك . وهوما أدى لظهور ملحقات للطريقه مثل رقم ثلاثه بالأنجليزيه كبديل عن حرف العين ورقم أثنين كبديل عن الهمزه , ألخ . قد يكون الأمر متفهم مع وجود لوحة مفاتيح لا تدعم اللغه العربيه , لكن الأمر قد أصبح عاده للكثيريين حتى يوفروا على أنفسهم عناء تغيير اللغه وهو ما أدى لأتقانهم هذه الطريقه للكتابه عن الطريقه العربيه , ولو لم يكونوا يفقهوا شئ فاللغه الأنجليزيه .
الخطير ف الفرانكو أرب أنه قد يساعد على أندثار الأبجديه العربيه وهو ماحدث فعلا ودون مبلغه فى بعض الدول مثل ماليزيا والتحول للكتابه بالأبجديه الأنجليزيه أو أن شئت الدقه اللاتينيه ليس نتيجة تغير سياسى كما حدث فى تركيا ولكن كنتيجه الأنصياع للتكنولوجيا , وهذا مالا نأمل حدوثه أبدا مع اللغه العربيه .


تخاريف صيام

- الحكومه قررت رفع أيديها عن كل شئ تدريجيا وهوماظهر فى أعلانات السكه الحديد حيث أشارت أن مسؤلية الحفاظ على القطارات مسؤلية مواطن وليست مسئولية الحكومه وبرغم تفاهة و ( معيلة ) استراتيجية الحكومه للحفاظ على السكه الحديد الا أنها ومع السقطات الحكوميه المتواليه فكره رائعه إن تم تعميمها فكل المجالات بمعنى أن يحكم المواطن نفسه ( وهى هنا فكره مختلفه تماما عن الديمقراطيه بمعناها المعروف )


سؤال ذكاء واللى يعرف يجاوب : المسلسلات و الأعلانات فى رمضان . أيهم نتيجه للأخر ؟

طب بلاش أجاوب أنا . فى البدايه ومع أنتشار المسلسلات ف التليفزيون وقبل ظهور الفضائيات كان التلفيزيون يقوم بأنتاج المسلسلات ولم يكن الهدف من أنتاجها هو الربح ف الاساس بل كانت الاعلانات مجرد نيجه مصاحبه للمسلسلات وهنا الأمر طبيعى تماما .
أما الأن وخصوصا فى شهر رمضان , المفترض أن تقل المسلسلات والبرامج لحدودها الدنيا لكن الواقع هو العكس وهذا بسبب الأقبال المتزايد على الأطعمه فى الشهر مما يستوجب زياده ف الاعلانات من الشركات لتحقيق المنافسه وبما أنك لن تجلس لتشاهد أعلانات فقط يتم خداعك بالمسلسلات وتكون أنت فى الحقيقه مشاهد للأعلانات
مش مقتنع طيب تفتكر ايه اللى يخلى منتج يصحى من النوم بدرى لأنتاج مسلسل وصرف مبالغ كبيره عليه سوى أنه مع ضخامة الأنتاج تزداد القنوات الراغبه فى الشراء بهدف زيادة الأعلانات , يعنى من الأخر مفيش أعلان مفيش مسلسل .
طب خد عندك كام مره بيتقطع المسلسل عشان الأعلانات , لكن عمرك فمره شوفت أعلان بيتقطع عشان مسلسل .


خبر جميل : أزدحام المساجد فى رمضان يدفع المسلميين للصلاه فى معبد يهودى بأمريكا , الأزهر يؤيد والواشنطن بوست ـ تبادل ثقافى غير مسبوق , لحد هنا خبر رائع يعكس قيم المحبه والتسامح لكن ومن غير ماتتهمنى بضيق التفكير أو بالتعصب ضد أى جهه تخيل لو حصل العكس : مظاهرات فالقاهره ومقاطعه فالرياض وهجوم على السفارات فصنعاء وهوب يتبخر المحبه والتسامح , طب تخيل لو واحد مسيحى جنبك فالمترو بيقرا من الأنجيل بصوت عالى . على رأى رفاعه الطهطاوى أو محمد عبده مش فاكر: الغرب إسلام بلا مسلمين ونحن مسلمين بلا إسلام

الثلاثاء، 18 أغسطس، 2009

مصر التى ليست لها صاحب

مصر فى رأيى طفل لقيط يتبرأ منه الجميع حتى يظهر له منفعه . بلد بلا ظابط ولا رابط , بلد يحكمها سائقى الميكروباص وأمناء الشرطه , كمية الفوضى فى مصر لو توزعت على العالم كله كانت لتكفى وتفيض , كمية فوضى لو وجدت فى أى بلد يحترم نفسه وشعبه لسقطت أنظمه وتغيرت حكومات . لكن كاإكتمالا للفوضى أصبحت – الفوضى – جزء أصيل من تركيبة المصرى . و الشواهد على هذا ليس لها حصر وفى كل شبر من أرض الوطن – لست اقصد بالوطن الأماكن التى لا يمكنك السكن فيها أو حتى دخولها الا لو كنت من علية القوم والمسئوليين أو حتى كنت أسرائيلى .
أقسم أنه أذا فكر أحد منا – سكان مصر الأصليين كما يسميهم بلال فضل – أن ينزل من بيته ساعه يمشى فيها على قدميه يدون مظاهر الفوضى التى يراها حوله لكتب مجلدات لا تتسع لها مكتبة الكونجرس .
وعشان كده نويت أكتب عن مظاهر الفوضى كل مظهر لوحده ويارب الحق أقول عن مظاهر الفوضى اللى انا شايفها كلها قبل م أموت , زيعنى لو حد من القراء الأعزاء شايف أى حاجه فوضاويه - يلا خليها عاينا ممكن نخليه يقولنا عليها - يلا سلام

الأحد، 16 أغسطس، 2009







ماهى السعاده .. حد يعرف ؟؟

الجمعة، 14 أغسطس، 2009

الا لعنة الله على الظالمين

أنا مجنون وأنت عارف كده وأنا كمان عارف كده , لكن زى مابيقولوا لو اللى بيتكلم مجنون ف المستمع , وأنت وكل حكام بلدنا ومسئوليها عاقليين , حد بقى يقولى ويطفى النار اللى فقلبى دى – اه والله النار اللى فقلبى – أخرتها أيه ف البلد دى , ياعم أنا لا هكلمك عن الغاز بتاع إسرائيل ولا عن الناس اللى مش لاقيه حتى تسكن فيها ولا ولا ولا . أنا بس عايز أتكلم عن المايه أو الماء أو المياه زى ماتسميها
أنا هنا بتكلم عن مصر مصر اللى من يوم ماتنيلنا على عينا وجينا الدنيا دى وهما بيقولولنا أن فيها نهر النيل العظيم ,أطول أنهار العالم , مش مثلا بتكلم عن السعوديه اللى يعنى بتحلى ماية البحر لا سمح الله .
معناه ايه بقى أن نص الخضار اللى بناكله مروى بالصرف الصحى – لو مش مصدقنى راجع أعداد المصرى اليوم لأسبوع فات وأسبوع جاى لحد مايوصلوا لكل الأراضى اللى بتتروى كده –
معناه أيه التايفود اللى داير على أهل القليوبيه وغيرها بسبب برده أختلاط مياه الشرب بالصرف الصحى .
أنا والله مجنون بس حد عاقل يفهمنى , حد يفهمنى بيرووا الأراضى ليه بالصرف الصحى فأمبابه , مش بكل عن الواحات ولا الصحرا الغربيه , لا أمبابه يعنى لو معاك جردل هتروح تملاه من النيل العظيم وتروح على رجلك تسقيه بيه الارض
حد يفهمنى ليه قرروا يخفضوا زراعة الأرزومنع تصديره عشان أستهلاكه الكبير للمياه – أنا بس عايز أفهم لما مصر تخاف ع المايه كده أى دوله فالعالم تعمل ايه
طب بلاش دى ياعمنا أنا مجنون وكمان مش فاهم والندره والندره النسبيه والكلام الحمصى اللى مش بيجيب همه ده
طب تعرف دى : تخصيخ 100 الف فدان فتوشكى لشركه خليجيه لزراعة البرسيم , لا وياريته برسيم لبهايمنا أحنا لأ يا استاذنا ده برسيم بيتجفف ويتبعت لبهايم الخليج مع العلم أن نسبه المياه اللى بيحتاجها البرسيم للفدان تساوى نسبته للأرز وأكبر من النسبه للقمح
يعنى من الأخر بهايم الخليج تاكل برسيم بمية النيل وأحنا ناكل خضار بميه المجارى
ماهو لامؤاخذه ياعم المستمع العاقل انا مقدرش كده أفكر الا فى حاجه كده بعيد عنك أسمها نظرية المؤامره , ماهومحدش يقنعنى أنها ماشيه كده وخلاص , محدش يقنعنى أن ده مجرد أهمال سوء تقدير أو تخطيط , لأ الموضوع أكبر من كده بكتير , أنت عارف الموضوع كده زى صاحب عماره ف الموسكى عايز يفضيها عشان يهدها ويبنى برج ولا مول فعمل أيه جاب أنبوبتين بوتجاز وقال يفجرها باللى فيها
المصيبه بقى أنى أكتشفت أن الجهل نعمه أن احنا خلينا كده مش فاهمين حاجه ناكل ونشرب مجارى وحاجتنا تتباع من أيدينا ونتسرق علنى ومش مشكله المهم يكون من ورانا وبغير علمنا
المصيبه انى أكتشفت أن الحل فى البلدى أنك تكون مجنون



الثلاثاء، 11 أغسطس، 2009

كل سنه وأنت طيب يا قلبى ياطيب


كل سنه وانت أجمل كل سنه وانت أحلى كل سنه والدنيا بيك كل يوم عماله تحلى

السبت، 8 أغسطس، 2009

ذنباً بلا رجعه ( قصه قصيره )

ملحوظتين كده : أولا النسخه دى من القصه ماتراجعتش لغويا أو نحويا والنسخه اللى تم مراجعتها فقدت فى ظروف غامضه عشان مايجييش حد فقيق يتكلم على كلمه مفتوحه ولا مكسوره والكلام ده , تانى حاجه لو حد قرا القصه دى وعجبته يهمنى أو أن رأيه يوصلنى , وشكرا .. على بركة الله .




أى حلمٍ غامض هذا الذى يأتيه فى لحظات قليله بحياه كامله قدرها ثلاث عقود ونصف من الزمن . يمررها أمام عينيه كمشاهد فيلم سينيمائى عديم الملامح بالرغم من وضوح ألوانه المبعثره .
للمره الأولى ينظر لحياته الباليه ومسيرته المهترأه بهذا الأهتمام , كمن سقط على رأسه جبلاً و ولم يفق من غيبوبته الا تواً .
نظر الى نفسه عبر هذه المشاهد السريعه كأنه يراها للمره الأولى , فلم يستوضح شيئا أو هكذا أراد , مد عينيه المغلقتين فى الظلام المنثور أمامهما يلاحق لقطات الفيلم المعروض محاولاً دفع شبح الامبالاه عن رأسه .
جذبته اللقطات الأولى بشده كطيف غائب منذ سنوات يتظاهر بالامبالاه تجاهه بينما يحترق من أعماقه شوقا لهذا الطيف , لم يكن هذا الطيف الا سنوات عاشها فى شبابه أعتبره الجميع فيها مثال حى على أمكانية إجتماع التدين و الأخلاق والنجاح فى شخص واحد , سنوات لم تدم طويلاً . أنتهت بالحادثه التى غيرت مجرى حياته تماماً وجعلت الناس تسقط عن أعينها الصوره الملائكيه التى كونتها له . إشتعلت الشقه التى يسكن فيها مع والده أثر مس كهربائى , حينها لم تكفى شجاعته لإنقاذ والده المريض فمات بين يديه مختنقاً . يومها نظر نظر كل من حوله الى هذه الحادثه على أنها لم تكن سوى جريمه مدبره , نفذها الأبن لتكون أقصر الطرق لحصوله على ميراثه من أبيه الثرى البخيل بعدما فشلت كل المحاولات فى إقناعه أن يساعده فى ترتيبات الزواج .
الغريب أن كل من حوله بالأضافه الى أقرب الناس الى قلبه وكاتمى أسراره قد أجمعوا على هذا التفسير فى حين لم تأخذ به الشرطه وأعتبرت الحادث قضاءاً وقدر , حتى خطيبته المخلصه ودعته بخطاب شديد اللهجه مؤكده أن شريك حياتها لن يكون قاتل مثله .
غُلقت كل الأبواب فى وجهه وقُطعت كل السبل بينه وبين من حوله , وجد نفسه فى مركز دائره قطرها ألف ميل والكل من حوله يشكلون الدائره التى تتسع حتى يختفى الجميع ويبقى وحيدا متمنياً صدر يرتمى باكياً فى أحضانه ويصرخ صرخه تسمع العالم كله .. أنا مظلوم .
وأى ظلم ؟؟ ظلمُُُُُ يذيب بحور الصفاء المنسابه داخله يذيبها فى قطرات سخطه على العالم , فتحيلها الى محيطات من الكره والقسوه والأنانيه , تحيله الى مسخ تقطر يداه بدم طفل بداخله قد قتل , أقسم أنه إذا لم يكن هو هذا المسخ الذى يهرب منه الجميع فسيصنع من نفسه مسخ حقيقى أقوى وأعتى , أن لم يكن بهذا السوء الذى يظنه الناس من حوله فسيجعل من نفسه أنسان أسوأ وأسوأ .
تحت التراب كان مصير ماتبقى له من أنسانيه تكفى لإسقاط دمعة ندم من عينيه , تحت التراب دفن أنسان إنتهت أيامه بميلاد مسخ فى هيئة بشر , وشرع فى بدأ حياه جديده لا أهل بها ولا وطن , ولا نديم ولا حب ولا سكن . أطلق لشهواته العنان فساقته لأقصى مراحل جنونها , فعل كل أنواع المعاصى ولم يكتف فأخترع معاصيه الخاصه . فلم تكن حياته الا خيط متصل من نزواته المتتاليه يحيكه ببراعه دون أن يظن لحظه أنه فى النهايه سوف يشنق نفسه بهذا الخيط , الخيط نفسه الذى يقيد ماتبقى من ذرات ضميره المدفونه تحت رماد خطيئته .
عاش حياته يتقلب مابين أحضان المومسات ومابين أوكار السكارى والمجرمين , ولا عجب من ضياع ثروة أبيه المهوله بعد ضياع ثروته الامتناهيه من الأخلاق والقيم . نسى أن لحياته نهايه محتومه لا مفر منها لم ينجح ولن ينجح أحد فى التحايل عليها , وأستمر فى تجاهله لهذه المسلمات وأعتبرها حياه أبديه , وظل ينهل من سموم هذه الحياه التى رضى بها ورضيت به , لا أهل بها ولا وطن ولا نديم ولا حب ولا سكن.
أشفق عليه كل من سبق وظلمه , ولم يتوقف هو للحظه ليشفق على نفسه , ليقول : مالى أقتل بقاياى بهذا الشكل , بهذا العنف , بهذا الرضا ؟ هل صدأ قلبه من كثرة الذنوب فعجز عن العوده , أم تبخر مع سموم أنفاسه المتصاعده لتحجب النظر عن عينيه فتزيده عجزا على عجز .. فما كان من قلب وما كان من عوده .




********************

أى حلم غامض هذا الذى يأتيه فى لحظات قليله بحياه كامله قدرها ثلاث عقود ونصف من الزمن . يمررها أمام عينيه كمشاهد فيلم سينيمائى عديم الملامح بالرغم من وضوح ألوانه المبعثره .
للمره الأولى ينظر لحياته الباليه ومسيرته المهترأهبهذا الأهتمام , كمن سقط على رأسه جبلاً و ولم يفق من غيبوبته الا تواً .
نظر الى نفسه عبر هذه المشاهد السريعه كأنه يراها للمره الأولى , نظر الى أعماقه أكثر فأكثر فلم يجد الا السواد الذى تكدس يوما تلو الاخر بخطاياه وأثامه . مندفعا بقلبه الفاتر , بعقله الفرغ , بدمه البارد وسط هذا لسراب الذى شكله بنفسه ولنفسه وعايشه وصدقه وأعتبره الحقيقه . حينها وحينها فقط كانت نفسه اللوامه تتقلب فى مضاجعها ضيقا من طول خمولها , بل كانت على الأدق تتقلب فى ظلمة قبرها مللا من طول موتها .
شيئا ما أهتز منذراًًًًً بأنقلاب وشيك الحدوث , شعر بها أتيه , أتيه بقوة ظمأ نبته بريه فى يوم صيف شديد الحراره . رياح أندفعت لتزيل التراب عن بقايا الأنسان المدفونه تحت ركام السنون العفنه . شيئا ما أهتز بداخله جعله يشعر بإشمئزاز ونفور لم يشعر بهم منذ أنسياقه فى هذا الدرب الكريه .
أتحرك المارد الراقد منذ سنون ؟؟ أإنقطعت قيود ضميره المحتضر لتوقظ فيه ماتبقى من أراده كافيه لتحيده عن هذا الدرب .
أى هاتف هذا الذى ترددت أصداء صوته فى جنبات هذا القلب العليل , و أى صوت جاء ليزيل الطلاء القذر الذى تكدس على جدران هذا القلب مع مرور الأيام ؟
حاله من الصفاء أتته لم يشعر بها حتى فى أكثر أيامه طهراً وعفه , حاله لم ينتظرها ولم يتوقعها , جعلته يشعر بتعاظم مشاعره النبيله أمام إضمحلال غرائزه الدنيئه التى سيطرت عليه كسيطرة الداء على الجسد العليل .
حينها أيقن أنه لابد له من الخلاص , الخلاص من دنيا سئمها بكل مافيها لدنيا أخرى يعلم أنه ينتمى أليها فى الأساس , الخلاص من حمل يحنى ظهره قبل خلاصه من الدنيا بكاملها الى العالم الأخر .
فى صمت قالها .. بل صرخها فى نفس الصمت مدويه ترج أركان نفسه بالكامل : مالى أقتل بقاياى بهذا الشكل , بهذا العنف , بهذا الرضا ؟! مدويه تنتزع جذور الغفله الضاربه فى أعماقه : الى متى سأظل منغمس فى هذا المستنقع الذى صنعته لنفسى وغوصت فيه حتى أذناى ؟ الموت من خلفى والنار من أمامى وقدماى مكبلتان فى الأرض ولا ملاذ لى إلاها , توبــــــه .. توبه نصوحه أمحو بها خطاياى وسواد صفحاتى , كفانى من عذاب الدنيا وكفى الدنيا من عذابى .


قالها وشهق شهقه نوى أن يخرج بزفيرها كل ماأحتوت نفسه من سموم , قالها وهو يتطلع لحياه جديده لا ينوى أن يندم عليها أبدا , بل قالها وهو يتطلع لحياه قديمه قدم وجوده , إنزوت مع الأيام فى كهفها ينوى أن يخرجها للنور ويعيد معها أمجاده .
فتح عينيه ببطء ليرى الدنيا بمنظوره الجديد كطفل يخرج للحياه للمره الأولى , فتح عينيه ناظرا للسقف .. هو لا ينظر أبدا أنه وضع مرآه فى هذا المكان , أى أخرق هذا الذى يضع مرآه فى سقف حجرته ؟؟
إن لم تكن هذه مرآه فلماذا إذن يرى فيما أعلاه وعلى أستقامة بصره هذا الجسد النحيل والذى ألف أن يكون جسده وهو ممدد فى مرقده الضئيل هكذا ؟؟ أقسم فى نفسه أن هذه ليست مرآه , ليست نوبة هذيان , ليس أسوأ كوابيسه وليته كان . تفسير واحد حاول الهروب منه الى أن لم يبق له سواه . نفس التفسير الذى قامت عليه كل كتب الخروج من الجسد والحياه مابعد الموت التى قرأهم فى صباه .
أنها روحه طافيه على الفراغ المنتشر فى المكان تنظر ساخره للجسد المنكمش على نفسه فرحه بتحررها منه ومن عذابه , إنها اللحظات القليله الباقيه التى تفصل دنياه الماضيه عن تجربه أخطر لم يخوضها بعد , تمنحه أخر أتصال بينه وبين هذه الحياه الفانيه .
هزه أعترته من رأسه الى أخمص قدميه , زلزال أحتوى نفسه المهزومه بالكامل يعصرها , يفتتها , ينثرها فى رياح فزعه العاصفه , يهدم له حلم كان غارقا فيه منذ لحظات لم يهنأ بتحقيقه , وجسدا يفور حول القلب العليل لاعنا أياه هو وكل لحظة أثم قضاها فى خدمة نواياه البغيضه حتى وصلا لهذه النهايه المشئومه التى لا رجعه منها , وروحا تتهاوى سقوطا بثقل خطاياها فى كل خطوه تخطوها لأعلى تجاه بارئها , تتهاوى سقوطا فى قعر الجحيم لتلقى التطهير الأبدى من أثامها .
كانت الصدمه كبيره حتى أنه لم يعش مثلها فى دنياه التى ولت , كانت لتقتله وتسلب منه حياته لولا أن هذه الحياه ذهبت بلا عوده , أدرك أنه تأخر كثيرا فى فراره من مصيره البشع حتى أنزلق فى خاتمه بائسه لعينه لم يفكر فى تحاشيها الا بعد فوات الأوان , كأنما لم يخبره احد أن الليمون لا يباع بعد العصر , وأنه لا توبة بعد الموت .
أظلمت من حوله شيئا فشئ , وشعر بنفسه يُسحب لينضم لصفوف المنتظرين لمصيرهم أمام بوابة الجحيم , إنطلق فى طريقه ليضمن لنفسه مقعدا بجوارى فى جحيم العالم الأخر , ليضيف لسجلات أمجادى , وينضم لسلة أنتصاراتى على بنى جنسه فى صراعى الطويل مع البشر الذى لم أرهق منه بعد , صراعى المستمر الى نهاية الكون كما نعرفه , هو كضحيه أخرى من ضحاياى الذين لم ينتهوا بعد وسأظل أطاردهم ماحييت , سأُهزم وسأنتصر لكنى سأستمر حتى أنتهى . أنا الملعون فى كل رساله وكل كتاب , أنا المكروه فى كل زمان و مكان . صاحب الذنب الأول فى الكون .. ذنبى الذى بلا رجعه .




تمت بحمد الله
أبريل 2005

الجمعة، 7 أغسطس، 2009

الكلمات المأثوره .. و المكسوره

الكلمات المأثوره

- لو كان الفقر رجلا لقتلته ( الإمام على كرم الله وجهه )
- الحكومه بتتعامل مع الشعب المصرى بطريقة مش لاقيين ياكلوا عيش ياكلوا جاتوه ( المؤرخ الراحل عبد الوهاب المسيرى )
- بقى ترضا تركب تاكسى مع سواق عنده 80 سنه طب أيه رأيك لو السواق ده حاطط أبنه على رجله وعايز يخليه يسوق ( طلعت السادات )
- يلعن أبو اللى غلوا العيشه ورخصوا اللى عايشنها ( بلال فضل )
- و أخيرا .. زغلل زغلل زغللنى ياللى حبك جننى ( منير حنا المتهم بـ سب الرئيس )

الكلمات المكسوره

- مصر عارفه هى رايحه على فين (صفوت الشريف ) - يا أستاذنا مصر دايره على حل شعرها من زمان , مش مهم أن هى تعرف هى رايحه على فين المهم صحابها هما اللى يعرفوا
- الحكومه دلعت المواطن زياده عن اللزوم ( الوزيره مشيره خطاب ) - روحى ياقادر ياكريم تتدلعى زى المواطن ده بالظبط
- أتفرجوا على البطاطس المصريه اللى مغرقه أسواق أوروبا ( أحمد نظيف) - هههههه والله نكته أوروبا منعت البطاطس المصريه المعفنه - حرفيا - تانى يوم بعد كلمة رئيس الوزراء المفدى
- ألجنزورى عرض عليا الوزاره وأنا اللى رفضت ( أيمن نور ) - وحياة خالتك؟؟
- قلوب المصريين أنخلعت مع حريق ستوديو مصر ( ماجده حليم صحفيه ف الأهرام ) - جتك خلعه فضرس عقلك الشمال , أمال قلوبهم ماتخلعتش ليه على أتحرقوا ف بنى سويف ولا قطار الصعيد ولا الى لسه بيتحرقوا كل يوم .
To be continued..

الأربعاء، 29 يوليو، 2009

يعنى ايه موزه

يلا بقى فرصه خصوصا إن خطيبتى مسافره اليومين دول وأن غاب القط العب يافار , يعنى وبعد ما بدأنا الكلام مع كلمة سيس وعرفنا الشباب أنها كلمه وحش خالص هنكمل النهارده مع كلمة موزه ونفهم الغلابه أنها كلمه بريئه خالص
أصل الحكايه أنى أول مره سمعت الكلمه دى من بنت كنت فتانيه جامعه وشى أحمر وعرقت ومبقتش عارف أعمل ايه على أعتبار أنها كلمه قبيحه يعنى , ونفس الحوار لم فلتت منى وقولتها قدام بنت أول مره و والله كان من غير قصد كنت بتريق ع الحته بتاعة قسم النزهه مش الموزه اللى ف الفيلم السخيف اللى أسمه الحب الأول
المهم وماعلينا من غير رغى كتير يعنى ايه مزه .. و هنا بقى عندنا أكتر من روايا هنذكر أهمهم
الأولى ودى الأكثر أنتشارا : أنها مشتقه من كلمة مزه والمزه دى على حد علمى حاجات كده عباره عن أكل أو تسالى خفيفه ذى الترمس والخيار وأحيانا الشيبسى بتنزلك مع البيره ومن هنا جت كلمة الموزه على أعتبار أن من غيرها القاعده ماتكملش
الروايه التانيه وهى قويه برده : أن كلمة الموزه مشتقه من كلمة المووزه بتاعة اللحمه على أعتبار برده - والعهده ع الراوى - أن المزه دى أجمل حته ف اللحمه
الروايه التالته ودى أضعفهم : أنها مشتقه من الكلمه الأنجليزيه ميز وهى تعنى الأم التى لم تتزوج من قبل . وأنا بالنيابه عن نفسى لا أومن أطلاقا بالروايه الأخيره دى خصوصا وأنى ماسمعتش كلمة ميز قبل كده
الروايه الرابعه ودى الروايه الوحيده الصحيحه والعهده هنا عليا انا شخصيا : أن كلمة موزه مشتقه من الكلمه اليونانيه Mozlita وهى كلمه تعنى الفتاه المتألقه ( ولكل المشككين المعلومه دى تم التاكد من صحتها من مصدر موثوق بيه وهو قناة العربيه الأخباريه )
ومن هنا نفهم أن كلمة موزه كلمه بريئه تماما من كافة الإدعاءات التى الصقت بها وده يعلمك أن وشك مايحمرش تانى لما تقولها قدام واحده زميلتك ولا حتى ف البيت .. اه سورى الكلام ده للنص ف الميه اللى لسه بيكسفوا من كلمه زى دى

الثلاثاء، 28 يوليو، 2009

المساجين التلاته


من اليمين : كريم , رامى , الحسينى

صراع الحضاره الواحده ع اليوتيوب

جرب كده و أعمل سيرش ع اليوتيوب على أى حاجه بالعربى أى حاجه مهما كانت ماتش كوره,عمرو خالد , العاشره مساءا , مظاهره , مايكل جاكسون أو حتى عن موزه جامده بترقص رقصه أجمد .
رغم أختلاف مضمون الفيديوهات دى كلها الا أن كلها هتشترك فحاجه واحده : الكومنتس أو التعليقات هتلاقى التعليقات كلها فيها نفس الميزه تكفير وخوض ف الأعراض وسب بألفاظ تقشعر لها الأبدان
مسيحيين بيشتموا ف المسلمين والمسلميين يطلعوا يكفروهم و شباب الحزب الوطنى يطلعوا يقلوا أدبهم على أى حد مش عاجبهم , واللى مش عاجبهم يطلعوا يأفوروا علي الحكومه والنظام , وكله من كده , أنما الشئ اللى زايد فعلا عن الحد لدرجه تتدعو للتقزز خناقات العرب بينهم وبين بعضهم ودى اللى مش هتلاقى كومنتات فيديو واحد خاليه منها مهما كانت طبيعته , المهم يكون عنوانه بالعربى . وخصوصا بتبقى الخناقات دى بين الخليجيين والمصريين . الخليجيين شايفين ان فلوسهم هى اللى عملت المصريين, و المصريين يدعوا انهم هما اللى بنوا الخليج وعلموا ناسها , الخليجيين يعاييروا المصريين أنهم بيبعتوا حريمهم نصهم يشتغلوا خدامات والنص التانى يتعمل فيهم حاجات وحشه بفلوس , أما المصريين شايفيين أن رجالة الخليج كلهم هوايتهم يتعمل فيهم حاجات وحشه وكمان ببلاش , وهكذا وهكذا . المهم أن ليهم قدره غريبه على قلب أى موضوع مهما كان لمشاجره وصراع أجناس وحضارات لم يتفتق ذهن حورج بوش نفسه عنها
عارف ان المشاخنات دى ممكن تكون على كل المنتديات لكن الغريب فموضوع اليوتيووب ده أنها ممكن تخلق من لاشئ , يعنى أيه اللى يخلى مقطع من حفله لمغنى أجنبى تعمل أزمه دبلوماسيه أفتراضيه بين مصر والكويت .
لو عملت شيفت زائد ألت وقلبت اللغه ودورت على أى فيديو برده بالأنجليزى , الموضوع هيختلف تماما كل التعليقات ف الصميم أه مايمنعش استخدام الفاظ بذيئه لكنها بتكون للتعبير عن الموقف مش للتجريح وكل التعليقات بتبقى عباره عن نقاش وحوار حضارى جدا للفيديو سواء بالسلب أو الايجاب , ومن التعليقات اللى عجبتنى جدا تعليق كان بيقول : رغم أنى بكره الراجل اللى بيتكلم ده جدا الا انى ف الموضوع ده متفق معاه 100% و الجميل ان تقريبا بتبقى كل التعليقات بالطريقه دى .
أه زى ما اخدنا فالكليه ان الانترنت وسيله قويه لتعميق المشاركه السياسيه و تنميه الحوار بين الشعوب – والمصيبه انى فاكر ان الدكتور كان كاتب مثال المنتديات العربيه – الا انى شايف ان الكلام ده عند الناس اللى بتفهم مش عند العرب المتخلفين

الأربعاء، 22 يوليو، 2009

هو يعنى أيه سيس ياعبد الواحد (للكبار فقط)

أنا فاكر أول مره سمعت الكلمه دى كنا مستنيين ملزمة المراجعه النهائيه , فضلنا واقفين ف المركز لحد 8 بليل تقريبا من كتر الزحمه لدرجة أنك كنت بتسجل أسمك وتستنى يردوا عليك , والراجل بينادى شاب أستظرف ورد على اسم مش أسمه راح التانى رد عليه وقله تصدق ياكابتن أنت شاب سيس .
وبالرغم من أن دى كانت أول مره أسمع الكلمه دى الا ان شئ غريب جوايا دفعنى للأعتقاد أنها كلمه قبيحه جدا وجريت على أحمد عبد الواحد صديقى ومعلمى المخلص ف الأمور اللى زى دى مستنكر أن حد يقول الكلمه دى قدام بنات فطبعا أتكرر الموقف اللى حصلى لما العيال أكتشفوا انى مش فاهم الكلمه أياها اللى مقصود بيها فقيع واللى قناة ميلودى كانت بتلمح لها ف اعلان كده - والشباب طبعا فهمنى - يعنى , العيال أعتبرونى شاب سيس بتاع مدارس خاصه مش فاهم الكلمه . المهم نرجع مرجوعنا لعبد الواحد بعد ما ادانى واجبى ف التريقه فهمنى أنها معناها شاب لا مؤاخد - واللى مش فاهم انشالله ما فهم - وهى فعلا مش مستصاغه تتقال قدام بنات بس اللى يشفع اها مش منتشره قوى
ونسنا الموضوع الا من خلال فترات متباعده كنا بنسمع فيها الكلمه أو حتى نقولها لحد ما أحمد حلمى باشا رجعلنا الفكره ف فيلم كده رضا , أنا عن نفسى مش شايف ان الرقابه تمنع الالفاظ البذيئه ف الأفلام خصوصا أن مفيش تقريبا يوم بنمشى فيه ف الشارع أو نركب المواصلات من غير مانسمع كلمه من دول لحد ما شاب كده يكون قلبه ميت و مش خايف من تباع الميكروباص يهتف بالجمله المشهوره اللى نفسى أعمل دكر ف يوم وقولها " ياأخونا فى حريم ف العربيه عشان ماتخلوناش نمد أيدينا على حد "
لكن المصيبه تكمن ف أيه ان تواجد الألفاظ دى ف التلفزيون وحده كافى لأعتقادنا فشرعيتها , وأكيد حصلك موقف وانت صغير لما باباك أنبك على كلمه بايخه كده وروحت انت رادد بكل لماضه دى بيقولوها ف التلفزيون .
ومن هنا اكتست كلمة سيس بلباس الشرعيه بعد كده رضا وبقينا نسمعها كتير جدا ونقولها أكتر لدجة أنى بصراحه جت فتره ماكنتش بتورع انى أقولها فى البيت أو حتى قدام خطيبتى , زاهو لما كان الواحد يتزنق يقول أنها يعنى واحد بتاع كمبيوتر وإنترنت
وبالظبط زى ماكنت بتسأل على معنى كلمة مزه وتلاقيلها مليون معنى كنت بتلاقى مليون معنى لكلمة سيس بس الحق يتقال أن سيس كان فى اتفاق أكبر على انها يعنى شاب لامؤاخذه
عشان كده أنا خدت على عاتقى المهمه التاريخيه لتصحيح المفهوم ده عند الشباب ويعرفوا ان كلمة سيس دى مش عاديه أبدا وان احمد حلمى والكرو كله بتاع الفيلم كانوا ضاربيين حاجه و أن المفروض أن إحنا نحط الكلمه دى فسياقها الحقيقى جنب كلمات زى *و* و زى **س
أنا فرأيى الشخصى أن كلمة سيس دى مشتقه من الكلمه الأنجليزيه sissy واللى هى تقريبا ما فرقتش كتير عن راجل لامؤاخذه ومش هوضح أكتر من كده وأتعب نفسك ودور ف القاموس . ولو لاحظت هتلاقى كتير الكلمه دى بتظهر ف الأفلام والست كومز الامريكيه وبتتقال ف نفس المواقف وبنفس الطريقه اللى بنستخدم أحنا المصريين كلمة سيس
و ياسيدى لو مش عاجبك رأيى قولى تفسيرك أنت
ملحوظه : ربما يكون الموضوع تافهه شويه أو أبيح شويتين وصاحبنا السيس أياه يطلع يقل أدبه ويرمى كلمتين مالهومش لازمه بس هنعمل ايه لازم ننور الشباب و مانسبش رضا وأخواته يضحكوا عليه . . يلا باى
أه صحيح كنت هنسى , لو عجبكم الموضوع بلغونى وأنا أقولكم المره الجايه معنى كلمة ب***ن

الأحد، 19 يوليو، 2009

مطبات يوم الشبكه part 1


زى مابيقولوا خبطتين ف الراس توجع لكن يوم الفرح أنا كان عندى خبطات كتير قوى وكلهم على راسى بس لولا ستر ربنا الأمور كانت مختلفه تماما ف النهايه ع الاقل عن ما انا نفسى كنت متوقعه وده كده واحده واحده اللى حصل
المهم بس ماسمعش صوت حد من اللى بيقولوا ان الجواز ده سهل عشان هو مش سهل خالص حتى لو كان يوم الشبكه مش الدخله

اه تحذير بسيط الموضوع ممكن يطول شويه ف اللى مالوش نفس يقصر م البدايه
أول ما الواحد صحى م النوم وطبعا عشان فرح ف البيت كان زحمه ع الاخر ودهاتسبب ف شوية مناوشات كده بينى وبين أهلى لكن الحمد لله تم السيطره عليها , وفوسط ده كله خطيبتى تتصل عشان لازم أقابلها أعرف مكان الكوافير واخد الشبكه وشوية حاجات كده وده كان تقريبا قبل معادى مع الحلاق بخمس دقايق وكانت مهمتى انى افهمها انى حاجه من الاتنين انى أنزل أقابلها أو أنزل للحلاق أو بمعنى أخر انى أروحلها أو أحضر الفرح من أساسا وطبعا لا حياة لمن تنادى , ومع أرتفاع حرارتى – نفسيا مش عضويا – لدرجه غير مسبوقه أوشك الوضع أنه ينفجر لولا ستر ربن
ا وتدخل ولاد الحلال
عديت على خير ورجعت تانى للمناوشات العائليه واللى كانت حدتها ابتديت تزيد هربت ونزلت للحلاق طبع
ا لطعنى جنبه لحد الزبون اللى فأيده مايخلص وقالى ببرودمعلش بقى ياعمروانت اللى جيت متأخر – حلاقى بقاله 10 سنين ومش بينادينى غير ياعمرو مهما حاولت أصحح له – مع علينا خلص الزبون ولسه هاقوم أقعد ع الكرسى لقيت بابا داخل , حقه يحلق هو كمان أحلق فبله ؟ ده حتى يبقى عيب أستنيت لما خلص وقومت جرى قعدت ع الكرسى قبل ما هيثم يجى يحلق هو كمان , قعد الحلاق يرسم شويه فدماغى وبعدين قلى أطلع خد دش وانزلى , رجعت و بعد لطعه تانيه عقبال مايفنش راس الزبون التانى أشتغل فدماغى وأبدع فتحفته اللى أصلا اسمها اضرب شعرك جيل وشوشر طرف القصه بالظبط كده زى اشرف عبد الباقى ف فيلم أشيك واد فروكسى والله من غير حلفان قولت ياواد فوت خالص يمكن أنت اللى مش فاهم . وطلعت وطبعا حضرتكم متخيلين ردود الأفعال دى حتى وصلت للتريقه من العيال الصغيره لحد ما حرارتى النفسيه برده عليت ل 120 سلزيوس وسيبت كل حاجه و مسكت ف العيال نفسى أبتلع أحشائهم
اه نسيت أقول ان سواق العربيه اللى مأجرينها سألنى وانا طالع قدامك قد ايه قولتله نص ساعه ساعه الا ربع , فبعتلى أبن عمتى يقولى انه أستأذن لمدة ساعه وراجع , هو تقريبا كده لما شاف شعرى قال عليا عبيط وهيعرف يشتغلنى وبالفعل عرف , فبقيت من غير تسريحه ومن غير عربيه
برطمان جيل جامد أنقذ الموقف وهدم الموناليزا اللى كان الحلاق عاملها على راسى فشر ليوناردوا دافنشى , الا كام شعرايا واقفين حلفوا مايناموا بحجة انهم صاحيين متأخر , بس كانوا أهون عليا من انى أسمع رأى الجموع اللى ف البيت بأنى أنزل للحلاق تانى أقوله عموا ياعموا ماما بتقولى ظبطلى شعرى ده غير انى مش هقدر اشوف النظره اللى ف عينه اللى أكيد هتبقى شبه نظره جاليليو بعد ما حرقوا مكتبته
عديت على خير دى كمان و لبست بمساعدة عمرو ابن خالتى اللى أكراما لكونى عريس خلص قزازه البرفان عليا واللى أديت حتميا انى أختنقت وجاتلى نوبة سعال حاد ربنا وحده كان القادر انه يخرجنى منها
وعديت على خير هى كمان لكن التوتر والزعيق والمشاكل والمناوشات والحر والزحمه والجبنه الاسطنبولى كان لازم كلهم يعلموا فيا ولقيت نفسى دايخ و هقع من طولى , جريت طبعا لماما وفجرت فوشها اللى أكبر من مفجأه عبد الناصر يوم التأميم : أنا مش نازل طبعا قبل ماترقع بالصوت فهمتها ان فضيحتى لما امتنع عن مرواح الفرح أفضل كتير من الفضيحه لما أقع من طولى فوسط الناس لقيتها قفلت الباب وأدتنى الدرس اللى هو ف الرجوله وتحمل المسئوليه وشفعتهم بقزازة عصير منجا من اللى هى اللتر دى قربعتها كلها لوحد ى وهوب نزلت شادد الرحال الى الكوافير منه والى العروسه


الأربعاء، 15 يوليو، 2009

دكان لامؤاخذه شحاته

أنا أصلا من يومى وأنا فاقد الأمل فاللى أسمه خالد يوسف ده بس أنت عارف بقى الزن ع الودان أمر من السحر والناس كلها قعدت تقول ده فيلم جامد أخر حاجه ومش عارف أيه كده
المهم قولت أتفرج ع الفيلم يمكن أكون طلعت ظلمت الراجل وأنه مخرج جامد يعنى زى مابيقولوا , لكن الأحساس الوحيد اللى جانى بعد الفيلم أن كان نفسى أجيب الناس اللى كانت بتقول ان الفيلم ده جامد وأقعدهم قدامى يتفرجوا عليا لمدة ساعتين وتلت بالرغم من ان الفرجه عليا مش هتكون بنفس الملل بتاع الفرجه على فيلم زى ده
فيلم أقل مايقال عنه انه بلا سيناريو أو قصه , ياراجل ده ولا حتى مناظر
أنا لا بدعى انى ناقد ولا حتى أفهم ف البطيخ بس ع الاقل أنا زى الناس كلها بعرف أتفرج
والنبى أيه القصه التافهه دى وكم المبالغات اللى عملوها عشان يحاولوا يطلعولنا السوبر هيرو الطيب بتاعهم ده واحد يطلع يقولى يابنى ده أكيد أسقاط وترميز لحاجه معينه , أقوله والنبى أتنيل مفيش ترميز بالسطحيه والتفاهه دى . زى يابنى والنبى غطى الشرخ بصورة جمال , مينفعش يابا الشرخ كبر قوى . ايه المباشره والسطحيه دى
وبعدين صاحبنا كان حابب يعمل فيلم ملحمى بقى وبيصور مصر على مدار تاريخها لكنه للأسف فشل فالسرقه من فورست جامب أو الحاله الغامضه لبنجامين بوتون اللى أستخدم السيناريست نفسه ف الفيلمين الأحداث التاريخيه كبديل عن ذكر التواريخ
فشلوا برده فسرقه الموسيقى التصويريه عشان من جمال الموسيقى اول ماهتسمعها هاتعرف انك سمعتها قبل كده ففيلم تانى هو يأما الاخر أو المصير و هاتفتكر انها لسه معلمعه معاك من ساعتها
الحاجه الوحيده اللى تفتح النفس ف الفيلم ده غير رجلين هيفا وهبى الممثل الجامد اللى أسمه عمرو عبد الجليل اللى كانالحاجه الوحيده اللى تستحق الفرجه
دكان شحاته .. فلتسقط السينما
*عارف ان المقال بايظ لأنى مختصر فيه بنسبة 90% بس يلا خلى القراء يقروا ويدلعوا

الثلاثاء، 14 يوليو، 2009

أعز الناس

كنت أشرع فى كتابة سلسلة مقالات جديده اخترت لها عنوان مؤقت هو أعز الناس , كنت أقصد بهذه الفكره التحدث عن أهم الناس المؤثريين فى حياتى سواء من الأسره أو الأصدقاء وهى فكره قديمه قد تناوالتها من قبل فى بعض وريقات صغيره كنت أدعوها مذكراتى
لسبب ما قد يكون هو الأنشغال تأجل البدأ فى كتابة هذه المقالات ليوم أو أثنين ثم أستمر التأجيل لأكثر من أسبوع بسبب أخر رغم أنه وثيق الأرتباط بالموضوع نفسه الا انى أشعر ان الان ليس مقام ذكره
ربما تكون المصادفه أو القدر أو حتى الحاسه السادسه – التى أدعى أمام نفسى أنى أملكها و أخاف التحدث عنها خشية أن تزول – ربما تكون هذه الأشياء هى التى الحت على عقلى للكتابه عن أعز الناس قبيل يومين بالتحديد من الحادث الذى تعرض له وبما ان الحادث نفسه لا يمكن ذكره هكذا والمرور عليه مرور الكرام هكذا فسوف أتحدث تماما عن اعز الناس كما كان سيخرج المقال لو لم يكن الحادث



هيثم أخويا .. هو بحق أعز الناس هو تقريبا ثالث الأشخاص الذين ولدت وحبهم بداخلى رغم أنه نفسه لم يكن قد ولد بعد
السبب الأول فى حبى له بالطبع بخلاف أنه أخى هو بسبب حبه لى نعم والذى كثيرا ما أعتقد أنه حتى يف
وق حبى له . وبرغم أنه أخى الصغير أشعر دائما وع العكس مما قد يبدو طبيعى أنه هو السند الذى قد الوذ اليه فى أى وقت. شعرت بهذا عندما علمت بخبر دخوله للجيش شعرت بجبينى يتصبب عرقا ووجهى يزاد سخونه وهذا مالم أكن أتوقعه أبدا , ذلك رغم مشاحناتنا و مشاجراتنا الكثيره على أشياء هى ف الأغلب تافهه مثل أستخدام الكمبيوتر أو مين ياترى قلب الجيل بتاع التانى رغم انه أحقاقا للحق كثيرا ما يكبر دماغه ويتنازل فى مثل هذه الأمور تماما كما يتنازل عن أسترداد أى مبلغ يعيرنى اياه وأيضا فى المرات التى لا تحصى التى عزمنى فيها على العشا , وذلك أنه عكس هذا تقريبا لم يحدث ابدا
أشعر دائما انه يهتم بأشيائى الهامه أكثر منى أنا نفسى فى كثير من الأحيان ولن أذهب بعيدا فحفل خطوبتى أكبر مثال
ورغم الحادث المؤسف الذى قد أصابه الا انى سعيد أنه قد يعفيه من الجيش حتى يظل قارفنا بدوشته ف البيت
ربنا يخليه لينا ويقومه بالسلامه

السبت، 11 يوليو، 2009

النهارده فرحى ياجدعان

ورغم ان اليوم كان مبتدى بايظ أصلا مناوشات وخناقات ف البيت ع الفاضى وع المليان والعربيات اللى كل من رتب لواحده تختفى ونقعد ندور على غيرها والحلاق اللى اللى بوظلى شعرى أنتهائا بحالة الهبوط الحاد اللى أصابتنى قبل نزولى لأصطحاب العروسه من الكوافير وتقريبا حاله مشابهه حصلتلها الا ان الحمد لله الأمور كلها عدت على خير تماما على خلاف توقعاتى خصوصا انه بيقولك الليله السودا بتبان من أولها
من أول م نزلت من العربيه قدام قاعة الفرح التعب والتوتر كله أختفى فجأه وحسيت ان الامور كلها تمام وأفتكر أن ده كمان حصل للعروسه
بصراحه اليوم كان جميل جدا , كان موجود كل قرايبى وصحابى والناس الغاليه عليا ضحكنا واتصورنا ورقصنا ومحدش قال علينا عريس رخم أو عروسه بايخه بالعكس كله قال ان احنا كنا زى اعسل
لأول مره أيدى تبقى فأيد عروستى كده عينيى عينك قدام قرايبها وقدام باباها ومتبقاش فارقه معايا ان حد يشوفنا ورقصت معاها لأول مره والناس كلها كانت مبسوطه
اليوم كان جميل قوى والحمد لله . شكرا لكل الناس اللى شرفونى والعيال صحابى اللى وجبوا معايا قوى - بصراحه وجبوا بكل الطرق والحدق يفهم - وشكرا لعروستى على يوم من أجمل الأيام اللى فحياتى ربنا يخليها ليا ويتمم بخير ويوفق كل الناس اللى عايزين يتجوزوا ويقلدونا يعنى
موضوع ذو صله

الأحد، 5 يوليو، 2009

الحادثه

اللينك ده ياجماعه فيه شرح بسيط ومجمل للحادثه اللى أكيد وصلتكم أخبارها فى جريده الفجر
http://www.elfagr.org/NewsDetails.aspx?nwsId=13344&secid=3237

الجمعة، 26 يونيو، 2009

قريبا على المدونه : ذنباً بلا رجعه ( قصه قصيره )

عن الرقابه سألونى

انت مع الرقابه أم ضدها . وطبعا هنا بتكلم عن الرقابه بتاعة السينما والتلفزيون وحتى الكتب مش الرقايه على المصنفات الفنيه لا سمح الله
مبدئيا كده مفيش حاجه أسمها معاها أو ضدها بس لو لازم أبقى ضدها و ده أنطلاقا من أن مينفعش حد يقولى أقول ايه وما أقولش أيه بس انا بره لازم أخلى عندى دم وأفهم ان حريتى تتوقف عند حرية الاخرين
من هنا وبما اننا بنتكلم عن الرقابه ع السينما وماشبه هتكلم عن النموذج الامريكى لسببين انها طبعا صاحبة الرياده ف السينما زى كل حاجه تانيه بالاضافه لا انها كما يرى الكثيرين ومش شرط أكون واحد منهم مجتمع منحل مالوش ظابط ولا بابط ماشى على حل شعره يعنى
عندك فأمريكا مثلا كل الأفلام فيها اللى بس السينما غير التليفزيون غير المسرح رغم أن عندهم فالمسرح بتحصل بلاوى سودا بس زيه زى السينما أنت اللى رايح برجلك وعارف ان الفيلم ده فى اللى فيه وعلى مسئوليتك وكل الافلام بتبقى مصنفه حسب السن وحسب النوع وده مش بيقتصر على الجنس بس ده ع العنف و الأفكار اللى تبدو متطرفه وده انت بتعرفوا قبل ماتروح الفيلم و واخد أبنك الصغير معاك وعارف اللى هاتشوفوه . وبعدين رغم الحريه دى الا تهم تقريبا مابيحصلش أنك تشوف فيلم سينيمائى مشهد جنس صريح زى اللى ممكن تلاقيه ففيلم بورنو - اهم بيخلوا عندهم دم شويه - وبعدين بالنسبه للتلفزيون لكل حاجه وقتها وفى تنويهات قبل كل برنامج وفى مواعيد لمشاهدة الأطفال . يعنى عندك جانيت جاكسون فضحوها ورفعوا عليها قضايا لما الواد جستن تيمبرلك رفع هدموها من غير قصد اللى أقصده أن احنا نفتح الرقابه بس نشيل كل واحد مسؤلية اللى هيشوفوه و نحط فدماغنا ان احنا برده تقاليدنا مختلفه ودى مسؤليه الصانع
ده بالنسبه للرقابه ع الجنس أما عن السياسه فدى حاجه تكسف . واحد صاحبى ف معهد السينما قالى ان احنا مفتوح شغلنا بدون رقابه سواء ف الجنس أو الدين لكن أبعد عن السياسه .. ما هم يا اخونا بشر برده جورج بوش اتماسخر أثناء ولايته فكل فيلم وكل حفله ماهم مش ملايكه برده ومش رموز زى م العالم الوسخه بتقول والسياسه عن الدول والدول بتاعة الناس كلها يبقى رأيى ان الموضوع ده يتشال م الاخر فيه الرقابه بس مافتكرش ان ده يحصل ف بلادنا دى
أما الدين وده أخر حاجه . مش لازم ناخد فيه النموذج المريكى ده خالص عشان دول عالم ولاد كلب مالهومش كبير بس رأيى ان احنا نفتح الموضوع لأصحاب الأفكار الغير مطروقه بس بشرط انها تكون من ناس فاهما ونلتزم بأننا فمجتمعنا سواء مسلمين أو مسيحين ليتا عادتنا ودينا واحترامنا لكل الاديان يعنى مايطلعش واحد والعياذ بالله يغلط فالذات الالهيه ولا واحد يمثل دور الانبياء أو الصحابه ولا يعمل زى مورجان فريمان ف فيلم بروس المعظم
ياريت أى حد يقرا الموضوع ده يسجل رأيه فى وجود الرقابه من عدمه

الاثنين، 22 يونيو، 2009

وهذا مقالى الأخير

وليرمنى بالحماقه من يشاء وليرمنى بالغرور, بالتفاهه, بالجهل أوحتى بالغباء . فليتهمنى بالجهل فى السياسه و الأجتماع " سيبك من السياسه و الأجتماع وخليك ف الأفلام والحاجات التافهه دى على قدك أصل فى ناس كده بتحب تمثل " الخ الخ الخ
لن أدافع عن نفسى أو أخوض فى الحديث عن دراستى أو محاولاتى ف العمل فى الصحافه لأن رحم الله أمرأ عرف قدر نفسه وأنا أعرف قدرى جيدا ولا خير فى شخص يعرفه الجميع ولا يعرف هو نفسه
كنت أشرف بالكتابه ولو كان شخص واحد يقرأ لى, لكنى أعتقد أن محاولات الغوغاء قد نالت منى , الغوغاء الذين حاولت كثيرا أن أترفع عن مواجهتهم . لكن الكيل فد طفح
أشكر كل من ترك لى تعليق ظريف أو سخيف كل من أنتقدنى بذوق و أحترام كل من قال لى فى وجهى كتاباتك مردود عليها كل من أخذ منى ورد على .
وأشكر كل من سبنى فى شخصى لأنه عرفنى على نوع جديد من البشر نافخى الأبواق كل منهم يعتقد انه السوبر مان يزهو بسب كل من يعلو عن قامته و هو الجبان الذى يختفى خلف أسم مستعار حتى لا يعطينى الفرصه لأريه فى نفسه عيوبه التى أتنقدها فى. أنا نفسى ورغم جرأة الكثير من أرائى لم أخفى أسمى أو صورتى
وحتى لا يسئ أحدهم فهمى أنا مستاء من السب وليس النقد , ربما أكون أسأت أختيار موضوعاتى أو أسأت أختيار جمهورى , ليس جمعيهم فالعديد من أصدقائى وأقاربى . لكنى أقصد الشرذمه الوقحه المختبئه خلف الألقاب المجهوله ,أو ربما أننى حتى لا أملك ملكة الكتابه نفسها
ربما تكون محاوله فاشله أخرى لكن على المرء السعى وليس عليه بلوغ النجاح ومن أجتهد فأصاب فله أجرين ومن أخطأ فله أجر .
أعرف ان من الخطأ أن أنسحب وأترك الحمقى يزهون بأنتصارهم , لكنى سئمت من تلقى أوساخهم وكم من تعليقات قمت بحذفها أتقاء تفاهتهم
فى النهايه لم تكن التجربه هباء . تعلمت منها الكثير وقلت الكثير تخيلت كثيرا انه سيموت فى صدرى , وسيكون هناك الكثير
لكن ليقال فى مقام مختلف
أستودعكم الله

الجمعة، 19 يونيو، 2009

أحسن الأفلام




دى بقى أفضل الأفلام العربيه والأجنبيه من وجهة نظرى اللى أرشحهالك تتفرج عليها

أجنبى :

- الأفضل على الأطلاق : القلب الشجاع ( brave heart ) : حاصل على خمس جوائز أوسكار منهم 3 لميل جيبسون لوحده , و أسطورة 1900 (legend of 1900 ): لتيم روس حاصل على الجلدون جلوب أحسن فيلم
- موسيقى : الطاحونه الحمراء ( moulan rouge ) لنيكول كيدمان
- رعب : برام أستوكرز دراكولا ( bram stoker`s Dracula ) للمؤلف المشهور برام ستوكر . جائزتين أوسكار أحسن ديكور وأزياء
- رومانس - ليت كوميدى : أشبه مايكون بالحب (A lot like love ) ل أشتون كوتشر
- أكشن : مهمه مستحيله 2 ( mission impossible 2) توم كروز
- كرتون : شرك 2 ( shrek 2 ) مايك ماير وكاميرون دياز . أوسكار أحسن فيلم كرتون
- تراجيدى (حزينى يعنى ) الآم السيد المسيح ( passion of the christen ) جيم كافيزل وأخراج ميل جيبسون
- فيلم مش أمريكى : أميلى ( Emily ) و أتفاق طويل جدا ( Avery long arrangement ) الفيلمين فرنسيين

أنا بصراحه مش فاكر بقيت التصنيفات ولا الأفلام يعنى ممكن يكون فى فيلم جامد و وقع منى

عربى
أفضل فيلم : الناصر صلاح الدين
أفضل فيلم أبيض وأسود : الشموع السوداء
أفضل فيلم أستعراضى عنائى : اليوم السادس . ورشه جريئه وهو بصراحه أبقى ظلمتهم لو قلت عليهم أستعراضيين أو غنائيين بس فيهم شويه أستعراضات حلوه بس هما عموما أكتر من رائعين خصوصا العبقرى الأولانى بتاع يوسف شاهين
أفضل فيلم قديم : أرض النفاق وحرام عليك أسماعيل ياسين وبصراحه فالفئه دى بالذات فى كتير جدا رائعين بس عشان هما كتير مش هختار غير دول بس بأعتبارى بحبهم من وانا صغير
أفضل فيلم كوميدى جديد : كده رضا , والناظر , وفيلم ثقافى على الترتيب
أفضل فيلم تاريخى أو لسيره زاتيه (ده طبعا بعد الناصر صلاح الدين ) : أيام السادات
أفضل مسرحيه : العيال كبرت و وجهة نظر

وفى كام فيلم أنصحك بيهم زى :
big fish , scent of women , sin city

هو فى أفلام تانيه كويسه كتير بس بصراحه مايستهلوش تقول على واحد فيهم الأفضل أو يمكن يكونوا برده ساقطين من دماغى ع العموم لو أفتكرت حاجه هبقى أضيفها





الخميس، 18 يونيو، 2009

أحمد مكى كل زمان ( والحدق يفهم )

بس الاول هشكر نقدك اصل كلامك اثر فيا
فى اللي بينقد نقد بجد ده علي راسي ومية المية
وفى اللي يسب ويشتم فيا ده مش ناقد لا نفسية
الله يرحمك يا دبور
يا ترى لو كنت عايش
كنت هترد و تقول ايه
يو يويو
م الاخر مهما هكون مش هعجب برضه شوية
وهيطلع كام مليون يقولى عنى ده تييت مقلية
يشهد جحا ويا حماره واللي بيحصل حاجة عادية
ومثلى الاعلى بقه هيكون شاب ديليفرى عزيمته قوية
لابس خوذة وراكب فيزبة ولا بيخاف تخبطه عربية
ولا بيهمه كلاب الشارع بس يوصلكوا طلبية
وانا هعمل كده بمحبة وهكمل والناس حواليا
حاجة أخيرة انا عايز اقولها للى شتموا اظن لذيذة
كل واحد فينا ليه استياله واي واحد فينا له ميزة
فى اللي بيعجب واللي ما يعجب واللى ما عجبو ياخد فيزا

الأربعاء، 17 يونيو، 2009

يا أهلا بالأبطال


وأخيرا عاد صديقنا الصدوق والجندى الشجاع بقوات حفظ السلام التابعه لللأمم المتحده
أيمن طه رجع من دارفور يامنز وأحنا بقى مستنينه يحكيلنه مغامراته مع المتمردين وبتوع جنداويد و عن الأهوال اللى شافها لما المتمردين خطفوه فجنوب السودان
حمد الله ع السلامه يا أيمن

عزومه مصريه

أنا عازمك النهارده على الغدا , النهارده وبكره وكل يوم ومش أنت لوحدك الدعوه مفتوحه لكل المصريين محدودى ومعضوضى أو حتى مغتصبى الدخل ومتقلقش الحساب عليهم
قولى هتاكل ايه ؟ أنا هسهلها عليك وهقولك المنيو
- عندك ياسيدى طبق الخضار سوتيه المتبل بالمبيدات المسرطنه المروى بمياه الصرف الصحى مطهى على الطريقه المصريه
- أما اللحوم : فعندك ستيك لحم البقر المشوى ع الفحم من أجود أنواع اللحوم المصابه بالحمى القلاعيه و جنون البقر , ولحم الضأن لخنزير أتمسك ف الطريق لحفله تنكريه فى زى خروف ولحسن الحظ أتدبح قبل مايتثبت عليه جريمة أنه خنزير , بالأضافه لطاجن الباميه المسرطن برده بلحم الحمير المصريه المفرومه ( ولا فكرك جلود الحمير اللى بتتصدر للصين دى لحمتها بتروح فين )
- الطيور : عباره عن الحمام المحشى بألفلونزا الطيور وصدور الدجاج المشويه على نار هاديه , هاديه قوى
- الأسماك : خليط من أجود أنواع الأسماك المسممه المرباه فى المصارف الفيتناميه (عفوا فنهر النيل والبحر المتوسط والأحمر خارج نطاق الخدمه )
- الخبز : فيقدم العيش البلدى المدعم المصنوع من أجود أنواع القمح الأوكرانى والروسى المخلوط بالحشرات والبذور السامه ( يضاف لهذه الخدمه بالتحديد أربع ساعات أنتظار فأى طابور من أختيارك )
- المشروبات : بما أن المياه المعدنيه فى أشاعة قويه بتقول انها ملوثه فلابد من الأعتماد على مياه النيل العظيم بالأضافه لهديه عباره عن كميه تكفى لـ 15 عام من الفشل الكلوى وحصوات الكلى مع كل زجاجه .
- أما الفواكه : فلك حق أختيار أى نوع منها شرط أن تكون محقونه بكميات وفيره من الهرمونات الضاره

أيه أخترت ولا لسه ياعم أنجز انت هتتبتر ع النعمه مش أحسن من بتوع بنجلاديش اللى مش لاقين النعمه دى وع العموم ما انت عارف معدة المصريين تاكل الظلط , أما لو مش عجبك الأكل أو حتى مقلق أطلب دليفرى من بره .. من بره البلد خالص

الاثنين، 15 يونيو، 2009

أفضل الكتب

دى مجموعة كتب أنا برشحها لو حد يعنى كان ممكن يحب رأيى أو يحطه ف الأعتبار ده ان كان أصلا حد بيقرا غير صفحة السينما والتلفزيون (فاهمنى طبعا )

روايات أجنبيه :
1 – شفرة دافنشى (دان براون )
2 – ملائكه وشياطين ( دان براون )
ورأى ان دول بصراحه أحسن روايتين قريتهم فحياتى التشويق فيهم مالوش حدود ومش هتحس أبدا بالوقت اللى راح ف ال 600 صفحه بتوع كل واحده ده غير انك هتكسب منهم معلومات كتير جدا وبصراحه دان براون ده عبقرى بمنى الكلمه وبكره ياخد نوبل وهاتقولوا أنى قولت . الروايتين كانوا الأكثر مبيعا (تم تحويل الروايتين لأفلام سينمائيه )

روايات عربيه :
1 – عمارة يعقوبيان ( علاء الاسوانى )
2 – أولاد حارتنا (نجيب محفوظ ) (رواية نوبل )
3 – هوس البحر وصمت الريح (روايتين فى كتاب واحد ) , (راويه راشد)
4 – مقتل الرجل الكبير ( أبراهيم عيسى ) روايه ممنوعه هى مش الافضل لكن لذيذه جدا

كتب دينيه :
هو مش عادتى للأسف أقرا كتب دينيه كتير لكن يعنى دول أفضل اللى فاكرهم
1 – 100 دليل على وجود الله (الشيخ الشعراوى)
2 – قصص الأنبياء ( الشيخ الشعراوى )
3 – 100 قصه من أنيس الصالحين وسمير المتقين

كتب ساخره

1 – ليك شوق فحاجه (مش متذكر الكاتب )
2 – الولد الشقى فالسجن ( محمود السعدنى )
3 – شكلها باظت ( عمر طاهر )
4 – مصر ليست أمى دى مراة أبويا ( أسامه غريب )
5 – بالطول والعرض رحله فى بلد الخواجات ( عاصم حنفى )

مجموعات قصصيه :

دماء وطين (يحيى حقى ) و فرأى دى الأفضل من نوعها على الأطلاق
قنديل أم هاشم (يحيى حقى )
النقش على الحجر ( مش متذكر الكاتب )
بنى بجم ( بلال فضل )
مافعله العيان بالميت ( بلال فضل )

ودول بينتموا لنوع الادب القصصى الساخر وهما من اروع ماقريتهم من هذا النوع ولو أنى مانصحش بيهم لأقل من 25 سنه

طبعا الكتب دى مش الأفضل بخلاف اللى انا أشرت اليه بكده لكن فى كتب كتير ربما كانت تستحق الذكر لولا أنى بس مش فاكرها بالأضافه انى أحب أذكر ان معظم الكتب دى موجوده ع النت وأحب أشكر شادى وعبد الرحمن عشان كانوا دايما فاتحنلى مكتباتهم بالنسبه لشادى ومكتبات أبوهم بالنسبه لعبد الرحمن خصوصا انى مش من عادتى أشترى كتب

كتب ماتقراهاش

1 – ماتقراش لتشيكوف ولو قالولك أن أفضل من كتب القصه القصيره ف التاريخ عشان خنيق
2 – ماتقراش كتب مثلث برامودا ولا الأشباح عشان كلها هلس وهيضحكوا على عقلك الصغير
3 - ماتقراش روايات الرجل المستحيل ولا ما وراء الطبيعه وصرخة الرعب أو أى حاجه من روايات مصريه للجيب عشان عيب بقى انت مبقتش لسه تانيه أعدادى ( ده مايمنعش ان كل قصص ميكى اكتر من رائعه )
4 – متقراش للعبقرى أحمد فؤادد نجم عشان ماتتاخدش
5 – أوليفر توست لتشارلز ديكنز عشان عامله زى الأفلام العربيه الفقيعه بتاعة بدايه التسعينات , ف اخر الفيلم أم الواد هتطلع بنت أخته وأبوه هيطلع جوز عمته
6 – ماتقراش لنزار قبانى عشان والدك مايظبطكش بالكتاب ويفتكره روايه بورنو مترجمه

أما الحلقه الجايه أفضل الأفلام العربى والأجنبى بتصنيفاتها

الأحد، 14 يونيو، 2009

يلا مش مشكله

السبت، 13 يونيو، 2009


زحام وأبواق سيارات مزعجه
اللى يطوله رصيف يبقى نجا
لو كنت جنبى حبيبى أنا
مش كنت أشوف الحياه مبهجه

الخميس، 11 يونيو، 2009


أضغط على الصوره لتكبيرها

أى كلام

  • نظريه :- معطيات : الحكومه بتدفع دعم للعيش المدعم أبو شلن , الحكومه بتسرقنا , البرهان: فلوس الحكومه حرام , نيجه : أذن العيش أبو شلن حرام , أستنتاج : أشترى العيش أبو ربع أحسنلك
  • شرطة المرور فكل دول العالم وظيفتها الاولى المحافظه على أنسياب سير المركبات ف الطريق ماعدا عندنا فمصر العكس تماما, مش مصدقنى اطلع على كمين عبود ولا كمين المرج ع الدائرى هتلاقى الطريق واقف من أوله لأخره لا لشئ الا لسعادة الكمين
  • عمرك لاحظت دى : كل ظباط الشرطه بكرش . تفتكر ليه
  • لو انت مش بتستحمى وتغير هدومك المقطعه القذره الا لما حد غريب يزورك تبقى معلش معفن بس مسيرك تنضف لكن يبقى أسمك ايه لما تقلع هدومك النضيفه وتوسخ نفسك بعد م الضيف يمشى , لو مش عارف أسأل أوباما
  • أحلى حاجه فعادل أمام انه ولا له فيها وعامل نفسه بيفهم ف كله , صدق اللى قال هلفوت
  • أيه وجه الشبه بين الشابكه والشبكة .. الأجابه : الاتنين بيكتفوك – والله بهزر – (أيوه ياعم بخاف انت مالك انت)
  • لقيت الواد قريبى الصغير بيشتم ابن عمته بيقوله ياعاهر يا ابن العاهره فلما هزقته , أمه فهمتنى وقالت سيبه سيبه بكره يطلع عضو ف مجلس الشعب

سوال محيرنى بجد

مبدئيا كده احنا المفروض متفقين أن الفلوس هى كل حاجه ولو انت مش معايا فى الموضوع ده أرجع للمقال التالت او الرابع فأول المدونه يمكن أقنعك
المعضله بقى اللى بقالها فتره واكله دماغى هى الاتى : دلوقتى بقى عندنا المفروض يعنى 3 طبقات أغنياء وطبقه وسطى وطبقة الفقرا . ولو انت مش عارف احب أقولك ان الطبقه الوسطى اللى فمصر فى تآكل مستمر ان كان متاكلتش اصلا . يبقى مش فاضل لنا غير طبقة اللى معاهم فلوس قوى وطبقة المفرومين قوى اللى انا وانت اكيد منهم والا مكنتش هتقعد تقرا كلامى ده وتبقى زمانك بتلف بعربيتك البى ام ف بورتو مارينا ولا العجمى ولا اى بورتو والسلام
الطبقه اللى تحت الوسطى دى بقى ياسيدى وماسيدك الا انا - على راى ماما - بتحاول انها تستخدم اداه هامه جدا عشان تطلع مش لا سمح الله لطبقة الاغنيا دى لكن عشان تلحق بالطبقه الوسطى , الاداه دى ياريس المفروض ان هى التعليم ودى حقيقه فعلم الاجتماع لو ماكنتش مصدقنى.
الاشكاليه ف الموضوع ده بقى ان الملاحظ ان مهما كان التعليم أو درجته فأن الفقير هيفضل فقير والغنى هيفضل كذلك ف الزمالك ولو ان الزمالك فيها انفلوانزا الخنازير ومبقتش تليق بالمقام . بس ياسيدى يعنى التعليم عمره ماهينفعك ف 90% من الحالات انك تبقى عندك كل سنه عربيه ع الزيرو وساكن فى فيلا ف التجمع الخامس والكلام ده كله الشر بره وبعيد.
تسمع انت بقى عن الصنايعيه ايوه الصنايعيه أى صنيعى من دول يعمله حتة مشروع محترم كده حتى لوكان شغال ف الزباله أو الخرده وصدقنى ف أحيان كتير بيبقى تقرف تسلم عليه ده. بقى اللى بيعملهم ياريس. أه مش بيوصل للطبقه الغنيه دى أبد بس ع الاقل يبقى بيلعبله فكام مليون وحط رجله مستريح ف الطبقه الوسطى أصل مش معقول انك هتعرف تعمل كده الا فى حالات تلاته انك تكون وارث أو حرامى أو عندك مشروع حلو تكون برده ف الاغلب وارثه ويكون بعيد تمام البعد عن اللى انت اتعلمته الا فى حالات ضعيفه جدا تانيه تعليمك هيفيدك فيها زى مثلا تكون دكتور ف الجامعه وشغال على ودنه دروس خصوصيه أو خريج كلية طب وفاتح عيادتك لعمليات الاجهاض والترقيع . حتى لو أتعينت موظف كبير فشركه محترمه هتبقى يعنى مستريح بس برده مش غنى بالمعنى المفروض
السؤال بقى بعد الدوشه دى كلها واللى انا عن نفسى عارف اجابته الخايبه اللى معظمنا هيعملها وانا منهم : ياترى ولادنا هنخيبهم ونطلعهم اصحاب شهادات زينا ولا ندخلهم اى ورشه يطلعوا صنايعيه معاهم فلوس. مثال: عندك واحد متخرج من كلية تربيه بجيد جدا شغال مدرس ب 200 جنيه ف الشهر وواحد صنايعى تانى عامل بوابة نفس المدرسه الحديد دخله ميقلش عن عن ... قول انت بقى وأوعى تقنعنى انه ممكن يتعلم وبعد كده يشتغل بالصنعه اللى اتعلمها ف الاجازه, أبدا عمره ماهيرضى الا لو كان عند ابوه مشروع مورثه ليه يشتغل فيه
ابن صاحب الفرن اللى بشترى منه العيش أبو ربع جنيه خريج هندسه وشغال فنفس الفرن واحد مره بيسأله ايه يابنى اللى انت عامله فنفسك ده رد وقله والله قدامى : انا متجوز ومخلف كده احسن ولا ال500 جنيه بتوع الهندسه

السبت، 6 يونيو، 2009

آدى الناس اللى بتفهم

يصراحه كده نفسى كانت مسدوده كده اليومين اللى فاتوا دول من المدونه وخصوصا بسبب الواد صديقى العزيز الغتت ده اللى أسمه فيه نسب لأحد ال البيت .
المهم بقى ان واحد صحبى عزيز برده غيره اللى هو عمرو حسن وهو بصراحه كده اللى علمنى ازاى اصلا اعمل مدونه كتب عندى فمدونته كلمتين حلوين فحقى ف فتح نفسى شويه كده ع العموم انا بشكره جدا ع الموالسه اللى والسهالى دى وأدى اللينك لو حب حد يقرا الكلام ده
http://welcome2amr.blogspot.com/2009/06/1.html

الأربعاء، 3 يونيو، 2009

ليس مهديكم المنتظر


بالتزامن مع زيارة الرئيس الأمريكى باراك حسين أوباما الى مصر غدا الخميس يعول الكثيرين على هذه الزياره , حيث تأتى أهمية تلك الزياره من هدفها القائم على توجيه رساله للعالم الأسلامى بهدف تحسين العلاقه معه بعدما شاب الكثير هذه العلاقه بين الأخير الشعب الأمريكى
الا انه من الواضح ان امال هؤلاء المتفائلين بهذه الزياره قد فاقت حتى الطموحات المعقوله وذلك للعديد من الاسباب . أولها أنها وكما أشارت الاداره الأمريكيه نفسها مجرد زياره لتحسين صورة العالم الاسلامى دون الاشاره من قريب أو بعيد الى أى مبادرات أو مشروعات. حيث ان القضيه الأسلاميه الأولى سياسيا الا وهى القضيه الفلسطينيه القضيه التى يكتسب كل الحكام العرب شرعية حكمهم من الدفاع عنها حيث انه من الملاحظ ان الاداره المريكيه كانت عاجزه عن ايجاد حلى منطقى للمشكله حتى قبل سبتمبر 2001 وأن صورة المسلمين السيئه ف الفتره الأخيره لم تكن هى المانع عن حلها , ثانيا ان أوباما حتى ولو كان مسلم وهو الغير صحيح بالمره ليست يده مطلقه لحل قضيه أو أخرى بل انه مجرد ترس فى ميكانيزم صنع القرار السياسى فى الولايات المتحده وأن الكونجرس واللوبى اليهودى هم بالنسبه لأوباما بمثابة حجر الكريبتون بالنسبه لسوبر مان بمعنى أخر انهم يمثلون له نقطة ضعف لا يمكن أن يعمل بمعزل عن الأحتياط أشد الأحتياط لها ولنا فى جون كيندى خير مثال

الفرق بين طابور العيش والطابور فى أدارة المرور

1 - طابور العيش لو واقف فيه 30 عمرك ماهتقف فيه أكتر من ساعه وده لو مامتك داعيه عليك أما الطابور فى أدارة المرور لو واقف فيه 6 عمرك ماهتمشى منه قبل 4 ساعات وده لو مامتك دعيالك
2 - طابور العيش مش هتقدر بسببه تبطل العيش ماهو مش معقول هتبطل تاكل عيش وتاكل كرواسون مثلا أنما طابور المرور هيخليك تتربى وتبيع عرابيتك تانى يوم (اللى مش لاقى تربيه يشترى عربيه - أحد الأمثال الدارجه فى أدارة المرور)
3 - يكفى أنك تعرف صبى خباز عشان يجيبلك العيش بالكوسه من برا الطابور أما فى المرور فأنت عايزلك ع الأقل نقيب بتلات نجوم
4 - فى طابور العيش هاتشوفلك بالكتير مشاجره أو أثنين أنما فى المرور هتشوف ع الأقل خمستاشر خناقه بالأيد و 7 حالات أغماء ده غير حالات التحرش والسب والقذف
5 - طابور العيش ممكن حظك يوقفك فيه كل يوم طول السنه أنما فى المرور بتقف يوم واحد أو أتنين طول السنه بس يخلوك تلعن الدنيا طول ال 363 يوم الباقيين
6 - فى طابور العيش دايما بتحس بنشوة الأنتصار لما توصل للشباك فبداية الطابور انما الأحساس ده عمرك مابتحس بيه ف المرور لأنك هتطلع من الطابور تقف فغيره أو فأحيان كتير تروح تجيب ورقه وترجع لنفس الطابور عشان تبتدى رحلة الأربع ساعات من جديد
7 - لو قليت أدبك فى طابور العيش صاحب الفرن هيطلع يديك على دماغك ويأدبك أنما ده هيكون أهون عليك كتير من حرقة الدم اللى هتكون فيها وأنت قاعد شايف الموظف قاعد بيتغدى جوه بكل برود وسايبك تتعذب بره من الساعه سبعه الصبح من غير حتى فطار

الخميس، 28 مايو، 2009

موضوع ضل الطريق الى جريدة البديل

محمد أنور صاحب أحد أكشاك الأحذيه فى شارع طلعت حرب . هذا الكشك الذى أكتسب شهره كبيره بين الشباب حيث أنه يبيع أحذيه من الماركات المشهوره أضافه الى انه يلاصق مركز طلعت حرب التجارى
يبدو السيد محمد أنور من الوهله الأولى مواطن عادى جدا الا انه اذا أقتربت منه وتجاذبت معه أطراف الحديث قليلا ستجد أنه يحمل أفكارا قد تختلف كثيرا مع أفكارك وأفكارى وأفكار السواد الأعظم من الشعب المصرى
نشرت البديل على صدر صفحتها الأولى منذ أيام صوره لشخص يحاول وضع صوره لجمال مبارك على أحد الأكشاك ، كانت الصوره غير معتاده حتى أن محرر البديل أكتفى بوصف الصوره ووصف مكانها بشارع طلعت حرب , لذلك قصدت الكشك الذى يحمل صورة مبارك ومن خلفها صورة نجله كمال لمعرفتة مبررات محمد أنور – صاحب الكشك والوقوف على حقيقة موقفه , وقد كان وكانت إجاباته الواضحه والمباشره كالأتى :
أعتقد أنه كان إالهام من عند الله لأنى أحبه , نعم لأنى أحبه وأحب أبيه الرجل الذى جنبنا تبعات الحروب طوال مدة حكمه والذى ساعدنا أن نحيا فى هذا النعيم –قالها هكذا حرفيا – فهو رجل لا يهمه الا مصلحة بلده وأنا أحبه منذ لقاءه بالشيخ الشعراوى وشعورى بأنه فعلا مثال للحاكم العادل وبرغم وجود بعض المسؤلين الغير شرفاء فهذا لا ينتقص من قدره شيئ
وأضاف أيضا أنه يرى فى جمال مبارك أمتداد لأبيه وأنه يتمنى أن يتولى الحكم من بعده فلا يوجد شخص يستطيع أن ينفى عليه هذا الحق
عندها سألته الا يدعم رأيك هذا مفهوم التوريث . أجابنى مسرعا وهل أتهم السوريين بشار الأسد بذلك عندما تولى الحكم
وأضاف قائلا ربما يعتقد البعض انى أسعى لمصلحه شخصيه من خلال الصوره لكن كان ذلك أجدى عندما حاولت المحافظه أزاله الكشك عام 2000 الا أن قضاء مصر النزيه أعاد لى حقى
وعن ردود الأفعال قال أتهمنى البعض بالنقاق او اننى تقاضيت مبلغ ماليه نظير ذلك حتى أنا هناك سيده تدعى انها مسئوله عن حركه مقاطعة البضائع الأمريكيه سبت العمال وسبتنى أثناء غيابى ولوكنت متواجد حينها لحررت لها محضر سب وقذف ماذا إذن لو كنت أضع صورة بوش البلاد العربيه جميعها تضع صورة رؤسائها فى كل مكان وصدام كان يعتقل من لا يقوم يتعليق صورته فعيد ميلاده إذن لماذا رفض صورة جمال مبارك اليس هو امين لجنة السياسات واحد اهم رجال الحزب الوطنى والذهى نعيش فى عصره فى نعيم حقيقى وفى أزهى عصور الديمقراطيه
حين ذلك أستفزتنى الأجاب فسألته أى نعيم فى طوابير العيش و التدنى فى كل شئ وأى ديمقراطيه فى أعتقال شباب مثل شباب 6 أبريل وأسراء عبد الفتاح ؟
فرد المواطن الكادح مثله مثله مثل أى شخص يبحث عن قوت يومه : الحكومه مسؤليتها صعبه "هتعمل أيه ولا ايه "إنما الشعب لا يملك رضا أو إراده أنما يملك فقط الجشع يريد أن يكسب قبل أن ينتج
أما عن شباب 6 أبريل واسراء عبد الفتاح قال أنه لا يعرف عنهم شئ وبعد أن أخبرته عنهم قال أن الديمقراطيه لا تعنى ان نتكلم فى كل شئ " والواحد لو ماشى جنب الحيط محدش هيجى جنبه"
ورغم أن ذلك خارج نطاق الموضع الا ان حديثه عن نزاهة القضاء المصرى وعن رجال الحزب الوطنى لم يجعلنى أتمالك نفسى الا وأنا أسأله عن رأيه براءة ممدوح أسماعيل صاحب العباره الذى يرى الكثيرين أنه مسنود من الكبير وعن أحمد عز صديق مبارك الأبن , ولم تكن أجاباته أقل غرابه من سابقيها: حيث رأى ان ممدوح أسماعيل برئ وان الحادثه قضاء وقدر فهل كان بينه وبين 1023 غريق خلافات كى يقوم بقتلهم , مثله تماما مثل سائق السياره الذى ينقلب خطأ بسبعة ركاب فى ترعة الأسماعيليه " وأن كان يسير بالسياره دون مكابح"
وعن أحمد عز فيرى أن الراجل"أيده نظيفه" وأى شخص فى مكانه الى جانب جمال مبارك سيتلقى نفس الهجوم ولو كان أبراهيم عيسى
وأخيرا سألته وانا الملم أوراقى : أذا دارت الأيام وجاءت بالنخبه المعارضه للرئيس مباركالى الحك فما الأمر بالنسبه للصوره حينها , فرد بعد تفكير عميق : ستبقى الصوره كما هى ولو كان ثمن ذلك أزالة الكشك.

الأربعاء، 20 مايو، 2009

سؤال محيرنى 1

ركز كده و خد بالك معايا انت أكيد طريقة قرايتك وأنت عندك 20 سنه مش هى نفسها نفسه الطريقه اللى كنت بتقرا بيها وانت عندك 6 سنين وأقصد بالطريقه السرعه والدقه يعنى لو هتقرا كلمة " المستقبل " مثلا وانت كبير كده هتقراها "المستقبل" كده خبط لزق لكن لو و انت لسه بتتعلم القرايه هتقعد بقى تتهجى وشغال بقى " المو المو المستق المستكبل " وتقعد تقرفنا معاك .... يارب الفكره تكون وصلت
السؤال بقى يا ترى احنا بنقرا أفضل وأسرع لما بنكبر لأن مهارتنا وسرعتنا ازدادت فعنينا تعدى ع الحروف وتقراها واحد واحد لكن بسرعه كبيره جدا . ولا أحنا مع الوقت أصبحنا حافظين شكل الكلمه لدرجة ان احنا بنشوف الكلمه على بعضها مش مجرد حروف . وياترى لو أحنى ف الحاله دى شفنا كلمه لأول مره. يعنى طبعا مش حافظين شكلها . ولنفترض مثلا انها برده كلمة "المستقبل " ياترى هاتتقرى بسرعه ولا هتقراها كده " المو المو المستق المستكبل " وبرده تقرفنا معاك
ياريت حد يحاول يجاوبلى السؤال ده وتكون أجابات جاده ولو واحد فقيق طلع وقالى انا أصلا مفهمتش أيه الهيس اللى انت بتتكلم عنه ده أقوله : دى بقى " مو مو مشك مشكلتك "