وبعوده الأيام

دلوقتى وبناء على طلب الجماهير – اه والله بناء على طلب الجماهير – انا هاتكلم عن شخصيه من الشخصيات اللى اثرت كتير فحياتى وحياه الكتير من الطلبه اللى زى الورد . تماما زى ما أثرت على مرارتى وبنكرياس وجهازى التنفسى كمان. خصوصا وانا كنت شايل فكرة المقال دى عشان اكتبها فصفحة التعليم فجريدة الدستور لما يعينونى فيها وابقى كده صحفى قد الدنيا .لكن هنعمل ايه بقى ليس كل مايتمناه المرء يدركه . المهم الشخصيه دى كانت دكتور ف الجامعه وطبعا مش هقول أسمه ولا حتى الحروف الاولى عشان ياعم ده راجل واصل وف الحزب وصديق الواد وصاحب أبوه. وماهياش ناقصه حبايبنا يسيبوا بنكرياسى ويروحوا لاخر جزء فجهازى الهضمى . بس زى ماحنا عارفين كده الجمله المشهوره اللى بتقول" اللبيب بالأشارة يفهم " ولو اللبيب مافهمش الجمله دى أقول له يعنى الحدق يفهم .المهم صاحبنا الدكتور ده أو ان شئت الاحتفاظ بالمقطع التانى فقط من الكلمه كان راجل فريد من نوعه يعنى فى الخمس سنين اللى قعدتهم ف الكليه تقريبا مشفتش دكتور زيه . يعنى مبدئيا كده كان الدكتور الوحيد اللى ف الكليه اللى طلب ان احنا نشترى الكتب من مكتبات خارجيه ,ماشى ياعم مفيش مشكله الراجل جاى من امريكا وعايز يجرب النظام الامريكن فينا حقه .نروح نجيب الكتاب فنفاجأ انهم خمس كتب مش كتاب واحد, لا وايه كل كتاب من نوعيه الكتب ام خمسمية صفحه دول , يابن المفتريه ..هى الكتب دى كلها هاتتقرى أمتى ده ناهيك اصلا عن مذاكرتها . بعدين دى مش مشكله برده المشكله ان انت لما تروح تحاسب الكاشير تلاقى المصيبه انه طالب منك300 جنيه فالوقت اللى فيه كتب كل المواد فأى قسم تانى لا يمكن تتعدى 120 جنيه بس هنعمل ايه عصرنا على نفسنا لمونه وقلنا معلش ماهو برده العلم لا يكيل بالبتينجان على راى اسمه ايه ده اللى انا مش فاكره اللى هوتقريبا كان عادل امام . نيجى بقى لنظام المحاضره اللى كان بياخد أول ساعه منها فالتريقه ع الناس اللى جايه متأخره وعلى لبسهم وتسريحة شعرهم وعلى المكرونه الوحشه اللى مامتهم بتعملها ع الغدا .مره دخلت بعديه بخمس دقائق, مش حوار يعنى , قلى انت ايه اخرك قلتله بصراحه يادكتور انا كنت جاى فى ميعادى بس كبرى المترو بتاع الجامعه بيبقى زحمه قوى .ردت بنت من اللى قاعدين قلتله ايوه يادكتور بيبقى زحمه والموضوع صعب قوى بس الحمد لله وصلت فمعادى ,قلى سمعتها قالت ايه .قلتله اه قالت يادكتور بيبقى زحمه والموضوع صعب قوى , صرخ بعلو صوته وقالى لأ دى قالت وصلت فمعادى وقعد يكررها يجى اربع مرات وبعدين قلى أتفضل خش ياأستاذ واوعى تتأخر تانى . وبعدين ماأتهنتش لسه وهاقعد ف البنج وقلى أستنى عندك بطريقه أمين شرطه على قديمه وراح مكمل : انت ايه ياأستاذ اللى خلاك تدخل القسم عندنا رتبت أفكارى ويرتنى كنت قلتها من غير ترتيب وأبتديت انى مبحبش المواد العملى وده أقل قسم فيه منها طبعا كنت هاشفعها بانى بحب السياسه ونفسى اشتغل صحفى وكده يعنى بس بقى راح لازق فأول نقطه وقلى .أنت واهم سيدى - بنفس اللفظ - هتسقط معايا يعنى هتسقط أتفضل خش . صحبنا بقى كانت طريقة شرحه ازاى وده من أول يوم لاخر يوم ميفرقش هو شرح الجزء ده ولا لأ ولا وصلنا فيه ف الكتاب, ولا أصلا الموضوع ده ف المقرر كل ده مكنش بيحطه فأعتباره لسبب بسيط انه لكن فيه مقرر ولا شرح ولا حتى أعتبار فكان يخش يقوم أى حد من الطلبه ويسأله سؤال أى سؤال يخطر فباله كأن يقله هو أنا عيد ميلادى يوم كام وان الطالب الغلبان معرفش يقعد بقى يسمم جتته من نوعيه ماهوعشان جهله ومش بتقروا جرايد انتوا ايه اللى جابكم القسم عندى هنا وكل يوم من ده, يقوم بنت تجاوب على سؤال فتبتدى وتقول بسبب يقولها يعنى ايه بسبب تقوله بعلة يقولها يعنى ايه عله تقول عشان يقولها ازاى يعنى ,أقسم بالله الكلام ده حقيقه كل محاضره عباره عن تلات ساعات من المسرحيه الهزليه دى .لدرجة ان احنا ليله المتحان كنا نفرش الخمس كتب بتوعه حولينا- وده طبعا ف التلات ترمات بتوعه ونقعد ندور على اى حاجه ليها علاقه بأسم الماده اهونذاكرها والسلام , لما نشتكى للدكاترا التانيين يقولوا اكتبه فى شكوى وارفعوها للعميد بس لازم الاول رئيس القسم يوقع عليها , مين بقى رئيس القسم؟.......بالظبط عليك نور يعنى مفيش فايده . ده المعيديين نفسهم قالوا ياجماعه محدش يزعل منه شوفوه بيعامل المذيعين ازاى فالتلفزيون وانتوا تعرفوا وياعينى مره شوفته ايام الانتخابات بيبهدل البت الغلبانه اللى اسمها نيرفانا بتاعة البيت بيتك ويعصرها عصر عشان بس قلتله يعنى ايه مشاركه كامله .تقريبا افتكرها كلمه بذيئه
المهم عشان مش اطول لانى اصلا طولت مره كنت داخل متأخر شويه فلاقيته بيقولى فين الحاجه , مفهمتش حاجة ايه ,البضاعه مثلا ماهو محدش قالى على مكان التسليم ولا حتى كلمة السر فقولتله بكل براءه حضرتك اصل انا محضرتش المحاضره اللى فاتت فصرخ .بعلو صوته بره أطلع بره .طلعت وانا بلعن فسرى التعليم والكليه والدنيا كلها اصل الحقيقه ان دى المره الوحيده اللى اطردت فيها من محاضره أو حتى حصة مدرسه . اللى عرفته بعدها ان الحاجه اللى كان بيسأل عليها دى تقريبا كانت بحث وان اللى حصلى ده كان أحسن بكتير من اللى كان هيحصلى لو حضرت عشان دى كانت المره الاولى فتاريخ الكليه اللى الابحاث تتقطع وتترمى فوش الطلبه ويتشتموا باسخف الالفاظ من عينة ياجهله وياحثاله وحاجات كده للدرجه اللى خلت الطلبه يتلموا من المحاضرات التانيه يتفرجوا على المهزله اللى بتحصل
ده والله حاجه بسيطه من اللى راجل ده عملوا معانا وماخفى كان اعظم بس الموضوع كده طول وانا مكنتش عايز اوجع دماغى ودماغ حد تانى بيه بس والله لولا الحاحات الجماهير وشكرا