كام بقى سؤال ع الماشى

• ليه الامام لما بيأمك فصلاة الظهر أو العصر بيسيبلك وقت كبير قوى تقرا فيه الفاتحه وسوره قصيره وتختم فيها المصحف كله لو طلبت معاك لحد ماتنسى اصلا انت ايه اللى جابك هنا وتكمل قرايه فجملتين بس: انا ايه اللى جبنى هنا وانتم عايزين منى ايه .بالرغم من ان نفس الأمام لما بيصلى بيك المغرب و العشا أو حتى الجمعه يقرا الفتحه من هنا ويسيبلك بعد كده بالظبط خمس ثوانى – وأبقى عدهم لو مكدبنى - عشان تقراها انت كمانويطلع يجرى ع السوره القصيره اللى بعد كده فلا يديك فرصه تركز ف الفاتحه اللى انت بتقراها ولا حتى تسمع السوره اللى هو بيقولها . مش فاهم بقى التناقض ده يبقى أسمه ايه أكيد مالوش أسم غير حاجه واحده : مادم انا اللى بقرا بصوت عالى أعمل اللى فدماغى ويحلالى .... أما حاجه غريبه والله

• السؤال التانى بقى ياريس فاكر فيديو البت المحجبه اياها اللى كان على تليفونك ؟ ايوه هو ده لما الواد صورها وهو بيلعب معاها - أو كان بيلعب فيها مش هتفرق كتير أهو كله رياضه – تفتكر بقى ليه بقى كانت الرنه بتاعت تليفونها اللى رن فوسط الماتش ده ليه كانت كالاتى"اللهم أسترنا فوق الأرض وتحت الارض ويوم العرض عليك يالله" بالرغم ان النغمه دى لو كانت قالت بوس الواو أو حتى واوا أح كانت بصراحه هتبقى مناسبه ومنطقيه وملائمه للجو النفسى – لوعايز تشيل أول حرفين فكلمة النفسى دى وتبدلهم بحرفين تانيين معنديش مانع – المهم كانت الامور هتبقى بيس خالص. بس ده كان كده تقريبا والله أعلم اللى بيقولوا عليه سخرية القدر وربنا يسترها معانا

• السؤال التالت تفتكر ليه لما تدخل البيت وتلاقى ريحة الفسيخ اللى انت بتحبه ماليه الدنيا , تقعد بقى ياعم تشم وتستمتع وتقول قشطه أمى شكلها هتظبط الغدا النهارده وبعديها بدقايق لما تكتشف ان دى ريحة جيفة القطه بتاعتك اللى ماتت تحت السرير من يومين تسد منخيرك وتطلع تجرى . مع ان الريحه ف الأتنين تقريبا واحده ..... غريبه برده

• تفتكر لما انا بقالى يومين بأدعى ع البلد تخرب أو حتى تتحرق بجاز والواد فلان الفلانى صاحبنا الشاب خريج الجامعه اللى زى الورد يحلف بأغلظ الأيمان ان لو بلد تانيه طلبته جاسوس ليها على بلده كان يوافق من النهارده مش من بكره .والواد صاحبنا اللى كل مايتكلم يقولك أمتى نهاجر ونسيب المخروبه دى , ده طبعا غير وغير وغير . وأنا هنا طبعا مش بتكلم عنك لو مانتاش حاسس بالكلام ده ولا بالناس اللى دايقه المر انت أصلا تلاقيك من عليه القوم اللى بياخدو 650 جنيه ف الشهر . المهم تفتكر لو بلد زى أسرائيل – اللى الشباب عندنا بيهربوا يتجوزوا بناتهم – فكرت تحتلنا مين فينا هيبقى ليه نفس يشيل سلاح ويضرب رصاصه واحده ويضحى بنفسه عشانهم , أقصد يعنى صحاب البلد .؟ وانا هنا بتكلم طبعا عن الناس اللى بيقبضوا 650 جنيه

• السؤال الخامس أيه أسوأ من انك تشتغل شغلانه مش بتحبها وفنفس الوقت مبتجبش تقريبا فلوس؟

• السؤال السادس تفتكر ليه الدنيا كتير قوى بتبقى وحشه ؟

• السؤال الأخير مؤقتا , وده هيبقى ليا أنا .تفتكر مين هيوجع دماغه ويقعد يقرا الهبل اللى انت كاتبه ده؟؟