يا علاواتك

أصلا موضوع العلاوه ده ميفرقش معايا ببصلله يخلوها خمسه % يخلوها عشره يخلوها عشرين يشيلوا ألدو يجيبوا شاهين ده كله بالنسبالى هيس بتفرج عليه كل سنه يوم عيد العمال وده كله لسبب بسيط جدا ان أنا من احدى الفئات الكادحه الغلبانه اللى ف البلد مش بتاخد العلاوه – قال يعنى اللى بياخدوها مش غلابه وبعدين فى سبب تانى موضوع العلاوه دى حركه قرعه كبيره قوى مش المفروض تطلع من راجل فالسن ده يعنى السنه اللى فاتت مثلا قلك ايه ان نسبة العلاوه هتكون غير مسبوقه وربك والحق الراجل مكدبش خبر وقلك خد عندك 30% وهوب وبعديها بتلات أيام خد عندك بقى الحكومه تعلى أسعار الساجير والسولار وبلاوى زرقه نانيه , طب أن كان ع السجاير أهى مضره بالصحه و هنحاول نبطلها والسولار برده غلط قوى أنك تروح تشربه ع الريق , لكن المصيبه انكتروح تشترى سندوتش طعميه تلاقى تمنه بقى الضعف ليه ياعم كده يقولك: السولار غلى يأستاذ أضطر امشى بعد ماأفحمنى واديلهنصيحه صغيره أبقى صفى الطعميه كويس عشان ماتشربش سولار كتير بتاع الميكروباص كان بغلاء السولار يزيد تكلفة النقله عليه ربع جنيه فبفقاقة أهلا كده يروح مزود الربع جنيه ده على أجرة النفر الواحد واهو رزق الهبل ع المجانين . يعنى من الأخر اللى الحكومه تدهولك ياليمين ياخدهم يتاع الطعميه والميكروباص الخ أضعاف مضاعفه بالشمال . يعنى زى مابيقولك كده من دقنه وأفتله .وعلى رأى فريد شوقى ياخى ............ولا بلاش دى . مابالك بقى بالناس اللى أصلا مش بتاخد العلاوه دى زى حلاتى كده وشملتهم الزياده اللى فأسعار كل حاجه دى . ده غير ان العلاوه دى بتبقى ع الدخل الاساسى يعنى ممكن انا لو باخد الف جنيه مرتب الشر بره وبعيد هيبقى الاساسى مثلا 200 يعنى العلاوه هتعملها كده 30 ,40 جنيه بالهنا والشفا .السنه دى بقى ورغم صوت الشنبات اللى كانت بتنادى العلاوه ياريس الريس أداهم بمبه كبيره قوى . ومقالش العلاوه ساعة الخطاب وبعديها بكام يوم هوب العلاوه 5% وعليك واحد . بعديها بكام يوم قائدنا الحنون خلاها 10% وأحمد عز فالمجلس يهلل ويقول الله أكبر قال يعنى هو والريس بتاعه مكنوش عارفين موضوع الزياده ده . لكن رغم عدم أهتمامى بموضوع العلاوه ده معرفش ليه خلانى أفتكر موضوع حكم العباره .تيجى تقولى والنبى ايه العلاقه . أجى انا بقى ياريس وأشرحلك . لما المحكمه حكمت على ممدوح أسماعيل لعنة الله عليه بالبراءه الناس قطعت هدومها وشدت شعورها ,فلما يجى بعد كده فالحكم التانى ويدى للراجل اللى قتل 1032 واحد 3 سنين هنصقف كلنا ونقول احنا كنا فين وبقينا فين . بالظبط موضوع العلاوه هنهلل ونقول ياه الراجل الكريم زودها الضعف مره واحده .بقت 10% يعنى مكملتش نص علاوة السنه اللى فاتت اللى اصلا بتتلهف أول بأول .سمعت ناس كتير قوى بتقول قشطه عند سماعهم اشلعة الغاء العلاوه السنه دى , قلك عشان ميلاقوش حجه يسرقونا بيها . أحنا فعصر حكومة مش لاقين ياكلوا عيش بلدى ..طب وفيها ايه يكلوا جاتوه .

ياخى ......... ولا بلاش دى