زى الحاجات 1 (سبايدر سوليتير)

تعرف لعبة سبيدر سوليتير .أكيد عارفها , عارف بقى ساعات كتير بحس ان اللعبه دى عامله زى الدنيا . اه زى الدنيا . يعنى عندك مثلا أنها فيها الوان كتير ساعات توزع الصف تلاقيه أسود كده ومهبب وساعات تانيه احمر وساعات من ده على ده . ساعت ممكن تغلط وانت بتلعب تعمل أندو ولا كنترول زد وترجع الغلطه دى وساعات غلطات تانيه ماينفعش معاها لا أندو ولا الطبل البلدى حتى , وتقعد طول مانت لسه ف الدور تقول لولا الغلطه دى كان زمان اللعبه بيس وكله تمام بس يلا هانعمل أيه . فى ناس تحب تلعب ع الايزى وناس تانيه تحب تستصعب وتجرب حظها . و كل حاجه بـ سكور وكله متسجل يامعلم
زى الدنيا برده ساعات حركه واحده تفتحلك كل الابواب وكتير قوى طول اللعبه تبقى عينك ع الحركه دى تموت وتلعبها و ماتعرفش توصلها ابدا , وساعات تانيه نفس اللعبه تقفل الدنيا كلها . ساعات تبقى سالكه وزى الفل ساعات تانيه معقده تخلص من لعبه رخمه بالعافيه عشان تتحط فلعبه أرخم منها . بس فكل الحالات ماتحطش فدماغك فكك ووزع رو جديد يمكن تسلك , وحتى لو ماسلكتش وزع رو تانى غيره وغيره وادى نفسك فرصه جديده وياعم لو فضلت مقفله أقفل الجيم خالص و أفتح غيره أو أعمل ريسترت ليه ولا حتى غير الويندز من أصله , هى شغلانه يعنى .
بس المشكله ان السبيدر بالظبط زى الدنيا ... مش دايما بتبقى فيها كسبان